ИРАН ОБЈАВИ ПОБЕДА НАД САД И ИЗРАЕЛ – Ова е планот од 10 точки што Трамп „бил принуден“ да го прифати

Иран објави дека постигнал „историска и разорна победа“ над Соединетите Американски Држави и Израел, тврдејќи дека Вашингтон бил принуден да го прифати иранскиот предлог од 10 точки, кој вклучува прекин на огнот, укинување на санкциите и повлекување на американските сили од регионот.

Според иранската државна телевизија Прес ТВ, Врховниот совет за национална безбедност соопшти дека „непријателот претрпе пораз“ и ги прифатил следниве точки од предлогот:

1. Прекинување на нападите врз Иран.
2. Продолжување на иранската контрола врз Ормутскиот теснец.
3. Прифаќање на збогатувањето на ураниум од страна на Иран.
4. Обврска Иран да не гради нуклеарно оружје.
5. Отстранување на примарните и секундарните санкции.
6. Суспендирање на сите одлуки на Советот за безбедност на ОН.
7. Повлекување на американските сили од Блискиот Исток.
8. Исплата на компензација на Иран.
9. Ослободување на замрзнатите ирански средства.
10. Крај на војната на сите фронтови, вклучително и во Либан.

Иранските власти тврдат дека нивните сили и сојузници во Либан, Ирак, Јемен и палестинските територии предизвикале големи загуби на спротивставените сили и нивната инфраструктура. По десет дена од почетокот на конфликтот, според Иран, САД започнале да бараат прекин на огнот.

Иранскиот министер за надворешни работи, Абас Аракчи, изјави дека Иран ќе ги прекине одбранбените напади ако престанат „неиспровоцираните“ напади врз земјата. За време на двонеделниот период на прекин на огнот, безбедното поминување низ Ормутскиот теснец ќе биде можно со координација со иранските вооружени сили.

Аракчи посочи дека решението е донесено по посредништво на Пакистан и по барање на САД за преговори. Американскиот претседател Доналд Трамп се согласил на двонеделен прекин на бомбардирањето, под услов Иран повторно да го отвори теснецот.

Преговорите меѓу администрацијата на Трамп и Иран за нуклеарната програма траат речиси една година. Експертите велат дека малку е веројатно САД да ги прифатат максималистичките барања на Иран, но тие можат да послужат како основа за разговори.

Особено проблематично се оценува барањето на Иран за контрола врз Ормутскиот теснец, бидејќи Иран немал контрола врз него пред почетокот на конфликтот. Демократскиот сенатор Крис Марфи го нарече ова „катастрофално за светот“.

Израел ја поддржува одлуката на САД за двонеделен прекин на нападите, но нагласи дека прекинот на огнот не важи за Либан. Израел побара Иран веднаш да го отвори теснецот и да престане со нападите врз САД, Израел и соседните земји.

Во израелската офанзива во Либан загинаа најмалку 1.500 луѓе, а уште 1,2 милиони беа раселени. Конфликтот започна кога Хезболах испука ракети кон Израел во знак на солидарност со Техеран.

Пакистанскиот премиер Шехбаз Шариф, кој посредуваше во прекинот на огнот, ги повика иранската и американската делегација да се сретнат во Исламабад. Преговорите треба да се одржат најдоцна во рок од 15 дена и можат да се продолжат со договор на страните. Белата куќа разгледува разговори еден на еден со Иран, но детали сè уште не се финализирани.