БОНУСИ КОИ ГО ПОТКОПАА ТИМОТ – Фудбалери барале 300.000 евра премии пред баражот, федерацијата загуби 100 милиони евра

Дебаклот во Зеница ја потресе италијанската фудбалска сцена до темел. Италијанската репрезентација се најде во нова криза која го тресе целиот фудбалски систем на земјата. Најголемата загриженост е тоа што четирикратните светски шампиони за прв пат во историјата ќе го пропуштат третото последователно Светско првенство, што претставува огромен удар и за угледот, но и за финансиската стабилност на федерацијата.

Според „Газета дело Спорт“, Фудбалската федерација на Италија загуби најмалку 100 милиони евра сигурни приходи поради неуспехот да се пласира на Мундијалот. Најголемиот дел од оваа сума, околу 45 милиони евра, се однесува на пропуштеното учество на Светското првенство.

Самото учество на завршниот турнир би донело најмалку 9 милиони евра од ФИФА, додека дополнителни околу 16 милиони евра се загуби поврзани со казни од спонзорите и намалена продажба на комерцијални права. Финансискиот удар е дополнително засилен со околу 20 милиони евра загуби во идни преговори со партнери и спонзори, бидејќи новиот неуспех значително ја ослабил преговарачката позиција на Федерацијата.

Болниот пораз од Босна и Херцеговина веднаш резултираше со промени на врвот на Федерацијата. Претседателот Габриеле Гравина поднесе оставка, а истиот пример го следеа селекторот Џенаро Гатузо и шефот на делегацијата Џанлуиџи Буфон, оставајќи го италијанскиот фудбал во фаза на длабоки промени.

Италијанските фудбалери, пред баражот против Босна и Херцеговина, побарале премија од 300.000 евра во случај на пласман, што изнесува околу 10.000 евра по играч, објави „Ла Република“. Селекторот Џенаро Гатузо ја прекинал дискусијата, инсистирајќи дека разговорот за бонусите треба да се води по постигнувањето на резултатот, а не пред клучниот натпревар.

На крајот, Италија беше поразена по пенали, Гатузо поднесе оставка, а репрезентацијата остана без трет последователен настап на Светското првенство.