ВОЕНИОТ ЗАЕМ ЗА УКРАИНА Е ПОДАРОК – А не вистински кредит
Фицо го оцени воениот заем од 90 милијарди евра како подарок, без очекување на враќање.
Словачкиот премиер Роберт Фицо остро го критикуваше европскиот воен заем за Украина, оценувајќи дека средствата во суштина претставуваат подарок, а не вистински заем.
Во видео обраќање на социјалните мрежи, Фицо изјави дека Украина нема да врати ниту едно евро од 90-те милијарди што се планираат, како ни од стотиците милијарди што веќе ги добила од Западот.
Фицо ја коментираше и одлуката на украинскиот претседател Володимир Зеленски да го прекине транзитот на руска нафта кон Словачка и Унгарија преку нафтоводот Дружба, нарекувајќи ја „глупава“.
Според него, одлуката на Словачка да ги прекине испораките на дизел и итна електрична енергија за Украина, како и потегот на Унгарија да го блокира европскиот заем за Киев, се логична реакција на потегот на украинската страна.
Фицо додаде дека Зеленски со своите одлуки им нанесува штета на Словачка и Унгарија и дека погрешно смета оти може да ги натера да го променат својот „мирен пристап“ во воен.
Словачкиот премиер изрази сомнеж дека Украина би можела дури и намерно да го уништи нафтоводот „Дружба“.
Во тој контекст, тој потсети и на експлозиите на гасоводот Северен тек, тврдејќи дека уништувањето на подводната инфраструктура не можело да се случи без знаење на украинското раководство.
Фицо нагласи дека Словачка има силна потреба од испораки на нафта преку Украина и дека нивниот прекин предизвикува значителни економски загуби и во цената на суровините и во транспортните трошоци.
Тој откри дека рафинеријата Словнафт во Братислава веќе почнала да користи нафта од државните резерви поради кризата настаната по прекинот на испораките.
Фицо најави дека на 10 март во Париз ќе разговара со претседателката на Европската комисија, Урсула фон дер Лајен, за суспензијата на испораките на нафта преку „Дружба“.
Тој истакна дека Словачка е подготвена да ја преземе улогата од Унгарија во блокирањето на европскиот заем за Украина доколку тоа биде потребно, со цел да се изврши притисок врз Киев за обновување на транзитот.
На 27 јануари, Украина го прекина транзитот на руска нафта преку „Дружба“ кон Словачка и Унгарија. Иако Словачка очекуваше испораките брзо да продолжат, тоа досега не се случи.
Словачките власти сметаат дека нафтоводот е технички исправен и дека прекинот е политичка одлука на Киев, насочена кон вршење притисок во контекст на евроинтеграциите на Украина.
Во меѓувреме, на 18 февруари Унгарија ги прекина испораките на дизел за Украина, а два дена подоцна блокираше и европски заем од 90 милијарди евра за Киев, сè додека не се обноват испораките на руска нафта.
