АМЕРИКАНСКИ ОБЛОЖУВАЧИ БЕСНИ – „Калши“ одби исплата за обложувања за Хамнеи
Платформата „Калши“ одби да исплати 54 милиони долари, тврдејќи дека смртта на Хамнеи не се смета за „соборување“
Американско-израелски бизнис директор мислел дека постигнал огромна добивка кога зелени ознаки се појавиле покрај неговата обложувачка прогноза за соборувањето на иранскиот врховен лидер, ајатолахот Али Хамнеи. Неговата обложба од 3.460 долари одеднаш се трансформирала во потенцијална исплата од над 63.000 долари, откако американски и израелски сили наводно го убиле Хамнеи во воздушен напад. Сепак, исплатата никогаш не се реализирала.
Платформата за пазари на предвидувања „Калши“ одбила да исплати вкупно 54 милиони долари на корисници кои се обложиле дека Хамнеи ќе биде „соборен“ од позицијата врховен лидер на Иран минатиот викенд. Компанијата ја образложила одлуката со тоа дека смртта на лидерот не се смета за „соборување“ од функцијата и дека платформата не дозволува облози директно поврзани со смрт.
Одлуката предизвикала незадоволство бидејќи обложувањето било дозволено и собрало милиони долари пред компанијата да ги објави конечните правила.
„Резервирав патување во Куршевел“, се пошегувал директорот во изјава за „Вашингтон пост“, мислејќи на познатото луксузно скијалиште во француските Алпи. „Потоа ги сменија правилата… и сите нè измамија.“
Иако платформата им ги вратила уплатените средства на сите обложувачи, многумина кои очекувале големи добивки изразиле гнев на интернет.
„Толку сум згрозен што искрено се откажувам од пазарите на предвидувања, барем во блиска иднина“, напиша еден инвеститор на социјалната мрежа Икс, порано Твитер. „Ми должите повеќе од 2.500 долари, а на многу други обични инвеститори им должите уште милиони.“
Критики стигнале и од политичари. Демократскиот сенатор Крис Марфи за „Вашингтон пост“ изјави дека ваквите пазари на предвидувања претставуваат „американска комерцијална неморалност на стероиди“.
„Кога настаните што вклучуваат добро и зло стануваат само финансиски производи, не знам како повеќе има смисла што е исправно, а што погрешно“, додаде Марфи.
Тој нагласува дека луѓето не треба да навиваат некој да умре само затоа што се обложиле на тоа.
