ИРАН РЕАГИРА – Стадионот „Азади“ мета на напад, бара реакции од ФИФА и МОК

Иранското Министерство за надворешни работи објави фотографии од спортскиот комплекс „Азади“ во Техеран, тврдејќи дека стадионот бил погоден во тековните напади врз Иран.

Портпаролот на министерството, Есмаил Багеи, на социјалните мрежи напиша дека станува збор за фудбалскиот стадион во Техеран и ја обвини САД за нападот.

„Ова е спортскиот комплекс ‘Азади’ во Техеран, фудбалски стадион кој го нападна истата онаа Америка чиј претседател ја доби ФИФА-наградата за мир“, напиша Багеи.

Тој исто така упати прашање до меѓународните спортски организации:

„Дали ФИФА или Меѓународниот олимписки комитет имаат некаков коментар?“

Американскиот претседател Доналд Трамп во декември ја доби нововоспоставената ФИФА-награда за мир.

Стадионот „Азади“ е еден од најголемите во Азија и претставува дом на иранската фудбалска репрезентација, во земја каде фудбалот е исклучително популарен. Минатата година, на „Азади“ се одигра натпревар на кој Иран обезбеди пласман на Светското првенство што ќе се одржи во Северна Америка.

Стадионот има и силна симболика во иранското општество. Децении жените во Иран се бореа за пристап до стадионите, а властите тоа го дозволуваа со голема неволност. Во 2019 година, токму на „Азади“ беше уапсена младата жена Сахар Ходајари, која се обидела маскирана да влезе на натпревар. Таа подоцна стана позната како „Сината девојка“ според бојата на дресот на клубот за кој навивала, откако се самозапали по изрекувањето на затворска казна. Нејзината смрт предизвика протести во Иран.

Историјата на „Азади“ датира од пред Исламската револуција во 1979 година, кога беше соборен иранскиот шах и воспоставена Исламската Република. Во 1974 година, на стадионот настапи американскиот пејач Френк Синатра, кој пред десетици илјади луѓе ги изведе своите најпознати песни, во време кога Иран беше значително помалку изолиран од светот.