ТРАМП ТВРДИ – Генералот Кејн не е против војна

Претседателот на Соединетите Американски Држави, Доналд Трамп, денес ги негираше медиумските извештаи дека началникот на Здружениот генералштаб на американските вооружени сили, генерал Даниел Кејн, е против евентуален воен напад врз Иран. Според Трамп, таквите тврдења се „100 проценти лажни“, а конечната одлука за воена акција ја носи исклучиво тој.

На својата социјална мрежа Truth Social, Трамп изјави дека „лажните медиуми“ објавиле статии кои погрешно прикажуваат дека Кејн е против војна со Иран. Претседателот нагласи дека, иако генералот не сака војна, според неговото мислење, евентуалната операција би била „лесна“.

Трамп потсети дека Кејн добро го познава Иран, бидејќи бил задолжен за операцијата „Полноќен чекан“, која се однесувала на напад врз нуклеарната програма на земјата. Претседателот додаде дека генералот „не зборувал ниту против, ниту за ограничени напади“, туку дека тој „знае само како да победи“ и дека, доколку ја добие наредбата, ќе ја предводи операцијата.

„Јас ја донесувам одлуката. Би претпочитал договор отколку воена акција, но ако не се постигне договор, тоа ќе биде многу лош ден за Иран и, за жал, за неговиот народ“, изјави Трамп.

Тој оценува дека иранскиот народ е „одличен и прекрасен“ и дека не заслужува да се најде во таква ситуација.

Сепак, според извори на „Аксиос“, генерал Кејн навистина го советувал Трамп и другите високи функционери дека воената акција носи значителни ризици, вклучително и можност за долготраен конфликт. Еден од изворите го опишал како „неволен воин“ за Иран, наведувајќи дека генералот ја оценува потенцијалната операција како високо ризична, со можни американски жртви. Друг извор истакнал дека Кејн не е против воена кампања, но е реалистичен во проценката на шансите за успех и можните последици.