КРИСТИНА КОВАЧ ОСНОВА ХОР ВО ШВЕДСКА БРАТСТВО И ДЕТИНСТВО – Југословенски хитови оживеаа во Стокхолм
Хорот „Братство и детинство“ изведува југословенски поп и рок хитови што враќаат носталгија кај луѓето од целиот регион.
Ќерката на познатиот композитор Корнелије Ковач, Кристина Ковач, основа хор во Шведска кој ги поврзува луѓето од сите генерации и националности.
„Нашата мисија е да градиме мостови и да го шириме пламенот на љубовта и хармонијата“, вели Кристина.
Хорот „Братство и детинство“ изведува југословенски поп и рок хитови од Тајчи и „Парни ваљак“, до Оливер Драгојевиќ и „Леб и сол“. Неговата приказна веќе освои регионални медиуми, а на социјалните мрежи публиката со носталгија ги доживува песните од младоста.
Кристина, која се занимава со музика од 13 години и настапувала со познати имиња како Бајага, Рибља Чорба, Рамбо Амадеус и Здравко Чолиќ, ја формирала групата во Стокхолм во 2019 година, со идеја да ги зближи луѓето од поранешна Југославија против поделби и омраза.
„Сакав да покажам пркос кон групите на интереси и политичарите кои ги разгоруваат конфликтите“, вели таа.
Хорот денес брои 52 члена, претежно жени во нивните 40-ти и 50-ти години, но со младите и постарите се создава вистинска заедница базирана на почит, емоции и спомени. Планот е да се отвораат локални ограноци низ Европа, а Минхен и Белград се веќе во подготовка.
Кристина нагласува дека не бараат професионални пејачи аматери со доволен талент можат да се приклучат. Хорот е полифоничен, со акцент на динамика, грув и стил на поп и рок музика, а пробите се еднаш неделно по два часа, со подготовка дома преку поставени аранжмани.
„Музиката е потсетник на зимските одмори на Тара, летните празници кај Макарска, спиењето на тераси на брегот додека свиреше бендот… Сè тоа го паметам со љубов“, вели Кристина.
Настапите на хорот веќе оставиле силен впечаток како видеото од изведбата на „Скопје“ од „Леб и сол“, кое собра многу позитивни реакции на социјалните мрежи.
