НАТО ОСТАНУВА СО УКРАИНА – Русија не може да победи на фронтот и напаѓа цивилна инфраструктура
Украинскиот министер истакнува дека Русија ја напаѓа цивилната инфраструктура поради неуспехот на фронтот.
Генералниот секретар на НАТО, Марк Руте, истакна дека Алијансата ќе продолжи да ја поддржува Украина, како преку обука, така и преку испорака на оружје.
Руте ги изнесе овие ставови по состанокот на министрите за одбрана на земјите членки на НАТО, за време на заедничката изјава со новиот украински министер за одбрана, Михајло Федоров.
„Сојузниците во НАТО работат напорно секој ден за да обезбедат што посилни безбедносни гаранции, со цел, се надеваме наскоро, да се постигне долгорочен прекин на огнот или, уште подобро, мировен договор“, изјави Руте.
Федоров додаде дека ќе ја презентира својата визија на состанокот на Контакт групата за поддршка на Украина и изрази очекување дека денес Украина ќе добие добра поддршка од партнерите.
Украинскиот министер истакна дека Русија не може да ја победи Украина на фронтот и затоа, според него, ја напаѓа цивилната инфраструктура.
