ДОКУМЕНТИ НА ЏЕФРИ ЕПШТАЈН – И Марин Ле Пен меѓу имињата

Француската левичарска партија „Неосвоена Франција“ (LFI) денеска побара формирање парламентарна истражна комисија по објавувањето на документи поврзани со починатиот осуден сексуален престапник Џефри Епштајн. Во новите документи се споменуваат имињата на неколку француски политичари, вклучително и Марин Ле Пен, лидерка на парламентарната група на Националното собрание.

„Сакаме истрагата, доколку е можно, да биде меѓупартиска работа“, изјави на прес-конференцијата заменик-претседателот на департманот Есон, Антоан Леомон, објави „Figaro“.

Минатиот викенд, Министерството за правда на САД објави повеќе од три милиони нови страници документи поврзани со случајот Епштајн, вклучувајќи повеќе од 2.000 видеа и околу 180.000 фотографии.

Покрај Ле Пен, во документите се појавуваат и поранешниот министер за култура Жак Ланж и неговата ќерка Каролина, поранешниот министер за економија Бруно Ле Мер, како и пратеникот и научник Седрик Вилани.

Според Леомон, постојат два главни аспекти што го прават неопходно делувањето на Националното собрание: „педокриминал и трговија со луѓе“ и „веројатен политички аспект, поврзан со влијание и финансирање на политички партии“.

„Првата опасност е тишината, бидејќи тоа поттикнува теории на заговор. Треба сериозно да се справиме со ова прашање. Постои и политичка одговорност“, додаде тој, најавувајќи дека LFI ќе предложи формирање истражна комисија до сите републикански парламентарни групи.

Во 2019 година, Епштајн беше обвинет во федералниот суд во Менхетен за трговија со малолетници и сексуална експлоатација на девојчиња. Жртвите, според обвинението, честопати му давале масажи. Епштајн почина во затвор во очекување на судење; неговата смрт беше официјално прогласена за самоубиство.