ВОДАТА Е БЕЗБЕДНА – Норовирус и бактерии пронајдени во ОУ „Димо Хаџи Димов“

Во средата, поголем број ученици од прво до петто одделение пријавиле стомачни болки. Според ИЈЗ, анализите на мострите од храна и површини во училиштето покажале присуство на фекални бактерии Enterobacteriaceae во мусаката и на неколку површини во кујната, што укажува на нехигиена. Од седум примероци биолошки материјал од деца со симптоми, шест биле позитивни на норовирус (Norovirus).

ИЈЗ информира дека приправни и дежурни екипи продолжуваат да ги анализираат мострите и биолошките материјали за да се справат со ситуацијата брзо и ефикасно. За дополнителните мостри од другите девет училишта, резултатите ќе бидат објавени во понеделник.

Претходно, во три чешми во училиштето е пронајдена фекална бактерија – две во училниците и една во кујната. Иста бактерија е пронајдена и во мусаката од кујната. Кај една од вработените во кујната е откриена стафилокока, а кај едно дете е потврден норовирус. Норовирусот се пренесува преку вода или храна заразена со фекалии и може долго да преживее на работни површини. Сомнежите се дека овие извори можеби предизвикале наглите симптоми кај учениците. Другата испитана храна – млеко, мусли, кроасан и водата биле безбедни.

Целосните физичко-хемиски и микробиолошки анализи на водата земена од училиштето покажаа дека сите параметри се во рамките на референтните вредности, а тешки метали не се пронајдени.

Директорката на ИЈЗ, Марија Андоновска, истакна дека и покрај овие наоди, сè уште не може целосно да се утврди причинителот на стомачните тегоби.

Досега се регистрирани 29 случаи кај деца и една наставничка. Пет деца биле сместени во Детската клиника, а вчера биле донесени уште две. Сите деца се во добра здравствена состојба и стабилни.