ШВЕДСКА ГИ НАМАЛУВА СРЕДСТВАТА ЗА СРБИЈА Земјата не презема доволно во борбата против корупцијата

Шведската влада донесе одлука да ги намали средствата за Србија, објавувајќи дека земјата не презема доволно мерки за борба против корупцијата и за почитување на владеењето на правото. Во официјалното соопштение, шведските власти истакнаа дека одредени видови поддршка за српските јавни институции ќе бидат прекинати, а средствата ќе бидат пренасочени кон зајакнување на цивилното општество.

Овој потег доаѓа по трагичната несреќа на железничката станица во Нови Сад, каде што загинаа 16 лица, вклучувајќи и две деца. Оваа трагедија предизвика масовни протести и стана симбол на корупцијата во Србија, особено во контекст на големите јавни проекти кои се реализираат во земјата.

Министерот за меѓународна соработка и надворешна трговија, Бенјамин Доса, изјави дека ситуацијата во Србија се развива во погрешен правец, нагласувајќи дека растечката корупција и непочитувањето на владеењето на правото се клучни проблеми. Тој додаде дека Србија не може да очекува шведска поддршка без спроведување на неопходните реформи.

Српското министерство за надворешни работи изрази жалење поради одлуката на Шведска, тврдејќи дека постигнат е значаен напредок во многу области. Тие истакнаа дека оценките за реформите треба да се базираат на реални податоци, а не на политички наративи или интерпретации од медиумите.

Шведска, пак, продолжува да ја следи ситуацијата во Србија и забележува недостаток на посветеност кон реформите, особено во областа на заштитата на основните слободи, како што се слободата на говор и печат.