690 МИЛИОНИ ДОЛАРИ ЗА УКРАИНА Ги исполни условите, но не сите реформи поминаа
Се бараат посилни реформи, борба со корупцијата и намалување на сивата економија.
Меѓународниот монетарен фонд (ММФ) и Украина постигнаа договор на експертско ниво за првата ревизија на четиригодишната програма за финансиска поддршка на земјата. Доколку договорот биде одобрен од Извршниот одбор на ММФ, Украина ќе добие дополнителни 690 милиони долари.
Од Фондот соопштија дека Украина до крајот на март ги исполнила клучните економски критериуми, иако дел од реформските обврски биле одложени или нецелосно спроведени. Поради тоа, е усогласен нов динамичен распоред за спроведување на реформите.
ММФ оцени дека земјата успеала да ја одржи макроекономската и финансиската стабилност и покрај војната со Русија, главно благодарение на меѓународната финансиска помош и домашните економски мерки.
Сепак, Фондот предупредува дека ризиците и понатаму остануваат високи, при што за 2026 година се прогнозира економски раст од само 1 до 1,6 проценти. ММФ истовремено повикува на продолжување на даночните и фискалните реформи, намалување на сивата економија и засилување на борбата против корупцијата.
