(ВИДЕО) ШОК, ТРЕСЕЊЕ И НЕВЕРУВАЊЕ Винчиќ откри како дознал дека ќе го суди финалето на Мундијалот

Словенечкиот арбитер Славко Винчиќ (46) ќе ја има честа да го суди големото финале на Светското првенство во 2026 година меѓу Аргентина и Шпанија, кое ќе се одигра во недела.

Винчиќ откри дека веста за неговото назначување ја добил директно од Пјерлуиџи Колина, претседателот на Судискиот комитет на ФИФА, а признал дека моментот бил целосно неочекуван.

„Првата реакција беше шок, а потоа дојде среќата. Се тресев. Неверојатна чест е да се суди финале на Светско првенство. Тоа е сон на секој судија уште од моментот кога ќе започне со оваа професија. Многу сум горд на себе и на целиот мој тим“, изјави Винчиќ.

Со ова назначување, Винчиќ ќе стане 23-тиот судија во историјата кој ќе го води финалето на најголемиот фудбалски настан и првиот Словенец со таква привилегија.

„Тешко е да се опише со зборови. Гордо ја претставувам Словенија на најголемиот спортски настан во светот. Мојот тим е исто така многу горд и ќе дадеме максимум“, додаде тој.

Винчиќ важи за еден од најискусните европски судии. Зад себе има бројни големи натпревари, меѓу кои и настапи на Европските првенства и финалиња на европските клупски натпреварувања. Тој судеше на Европското првенство 2020, а во 2022 година го водеше финалето на Лигата Европа меѓу Ајнтрахт Франкфурт и Ренџерс.

Во 2024 година беше главен судија на финалето во Лигата на шампионите меѓу Борусија Дортмунд и Реал Мадрид, а беше дел и од Европското првенство во Германија, каде го судеше полуфиналето меѓу Франција и Шпанија.

На актуелното Светско првенство ова е негов втор настап. На Мундијалот во Катар во 2022 година водеше два натпревари, додека во 2026 година досега ги судеше дуелите Бразил – Мароко, Јордан – Алжир и осминафиналето Мексико – Еквадор.

Словенечкиот судија нагласи дека успехот не е само негов, туку на целиот судиски тим, особено на неговите помошници Томаж Кланчник и Андраж Ковачиќ.

„Судењето е тимска работа. Без Томаж и Андраж ова не би било возможно. Многу сум среќен што ги имам покрај себе низ целата кариера. Ние сме одлични пријатели и одличен тим“, рече Винчиќ.

На финалето четврти судија ќе биде Јорданецот Адам Махадме, додека резервен помошен судија ќе биде неговиот сонародник Мохамад Ал Калаф.

Introducing your referee for the @FIFAWorldCup 2026 Final….🥁

Congratulations, Slavko Vinčić! 👏 pic.twitter.com/OMLJ3oA31p

— FIFA (@FIFAcom) July 17, 2026