ТРАМП СО ПРИТИСОК ПРЕД КРАЈНИОТ РОК – Виткоф во посета на Москва

Специјалниот пратеник на американскиот претседател Доналд Трамп, Стив Виткоф, денеска пристигна во Москва, пренесуваат руските медиуми. На аеродромот Внуково, Виткоф беше официјално пречекан од специјалниот претставник на рускиот претседател Владимир Путин за економска соработка со странски држави, Кирил Дмитриев.

Посетата се случува само неколку часа пред закажаната средба меѓу претставниците на САД и Русија, која, според најавите, треба да се одржи во текот на денот. Американскиот претседател Доналд Трамп вчера потврди дека состанокот е закажан, но не откри детали за форматот и составот на делегациите.

Средбата се одржува во критичен момент – само неколку дена пред истекот на ултиматумот што Трамп му го постави на рускиот претседател Владимир Путин за постигнување договор за прекин на огнот во Украина. Доколку не се постигне конкретен напредок, Трамп се закани со нов бран санкции кон Русија.

Иако официјални информации за точната агенда на состанокот сè уште нема, се очекува во фокусот да бидат безбедносната ситуација во Украина, можноста за деескалација на конфликтот и евентуален механизам за мониторинг на прекинот на огнот. Очите на меѓународната јавност се вперени кон Москва, со надеж за дипломатско поместување по месеци интензивни тензии.