ТАЈВАНСКИОТ ЛИДЕР ОТИДЕ ВО ЕСВАТИНИ – Пекинг жестоко реагира

Кина остро ја осуди посетата на тајванскиот лидер Лаи Чинг-те на Есватини, оценувајќи ја како „смешен чин“ и уште еден доказ за, како што велат, „скандалозниот сепаратизам“ на Тајван.

Лаи пристигна во Есватини на својата втора официјална странска посета откако ја презеде функцијата во мај 2024 година. Според кинеското Министерство за надворешни работи, тој ја напуштил територијата на Тајван во момент кога островот сè уште се опоравувал од земјотрес, обвинувајќи го дека ги игнорирал граѓаните и трошел јавни средства за „политички спектакл“.

Од друга страна, Лаи порача дека посетата има за цел да го зацврсти долгогодишното партнерство со Есватини и нагласи дека Тајван нема да подлегне на надворешни притисоци, истакнувајќи ја својата намера за продолжување на меѓународната соработка.

Пекинг повторно го потенцираше принципот на „една Кина“, тврдејќи дека Тајван е неразделен дел од кинеската територија. Воедно, ги повика земјите кои одржуваат дипломатски односи со Тајван да ја преиспитаат својата позиција и да престанат со поддршка на, како што велат, сепаратистичките сили.

Есватини, поранешен Свазиленд, е единствената африканска држава која има официјални дипломатски односи со Тајван и е меѓу малкуте преостанати сојузници на Тајпеј во светот.

Спорот меѓу Кина и Тајван трае од 1949 година, кога по граѓанската војна двете страни се разделија. Додека Пекинг го смета Тајван за своја покраина, властите во Тајпеј функционираат како независна држава со сопствен политички и економски систем.