СРЕДБА ВО НАРОДНАТА КАНЦЕЛАРИЈА Силна порака за поддршка на децата што се борат со канцер

На средбата со претседателката, родители на деца со канцер упатија апел за финансиска поддршка од државата.

Претседателката Гордана Сиљановска-Давкова вчера во Народната канцеларија во Скопје се сретна со претставници на граѓанското здружение „САНО“, кое ги обединува родителите и децата кои ја победиле или сè уште се борат со канцер.

На средбата тие ја информираа претседателката за досегашната и тековната работа на здружението, како и за проблемите и предизвиците со кои се соочуваат.

Мајките на излекуваните деца се осврнаа на тешката борба со болеста, но и на недоволната системска поддршка и разбирање во тој процес.

Според нив, справувањето со тешката болест би било значително полесно доколку државата обезбеди финансиска помош во форма на паричен надомест за време на болничкото лекување, како и во првите пет години по лекувањето, поради зголемениот ризик од повторно појавување на болеста во тој период.

Децата ја запознаа претседателката со своите образовни и културни активности, како и со нивните планови и очекувања.

Претседателката изрази восхит за нивната храбра борба и победа над тешката болест, како и поддршка за нивните стремежи и разбирање за нивните барања.

Таа посочи дека „САНО“ може да го користи просторот на Народната канцеларија за да ја запознава јавноста и да ја подигнува свеста за проблемите со кои се соочуваат.