СКАНДАЛ СО ПРИВАТНОСТА Фејсбук можел да ги гледа и фотографиите што никогаш не сте ги објавиле
Италија ѝ изрече на компанијата „Мета“, сопственик на Фејсбук и Инстаграм, казна од неверојатни 805 милиони евра поради неовластен пристап до фотографии и видеа од мобилните телефони на корисниците со оперативен систем Андроид.
Според истрагата на италијанското тело за заштита на личните податоци, проблемот се однесува на функцијата „Get suggestions from gallery when browsing Facebook“, која од 2023 година им нуди на корисниците предлози за фотографии и видеа од нивната телефонска галерија што би можеле да ги објават на Фејсбук. Техничката анализа покажала дека апликацијата барала само едно одобрение за пристап, кое опфаќало повеќе различни функции. Притоа, известувањето до корисниците било премногу општо и не им давало јасна претстава дека со дозволата овозможуваат пристап и до нивната фотогалерија.
Дополнително, функцијата била однапред активирана. Доколку корисникот ја одобрел дозволата, апликацијата можела да ја чита целата архива со фотографии и видеа на телефонот, вообичаено со траен пристап. Италијанскиот регулатор оценил дека ваквата практика го нарушува правото на приватност и правилата за информирана согласност.
Покрај паричната казна од 805 милиони евра, на „Мета“ ѝ е даден рок од 60 дена да ги промени правилата за користење на спорната функција. Компанијата ќе мора да побара посебна и јасна согласност од корисниците, детално да објасни за што се користи пристапот до фотографиите и видеата и да овозможи едноставно исклучување на функцијата.
Особено важно е што функцијата ќе мора да биде исклучена по основните поставки, дури и кај корисниците кои претходно веќе дале општа дозвола за пристап. Според италијанскиот регулатор, потенцијално погодени биле околу 20 милиони корисници на Андроид во Италија.
Одлуката предизвика нов удар врз технолошкиот гигант. Од „Мета“ најавиле дека ќе поднесат жалба, оценувајќи дека одлуката е погрешна, а изречената казна несразмерна. Компанијата тврди дека станува збор за едноставна функција која им помага на корисниците полесно да споделуваат фотографии и видеа и дека за нејзино користење е потребна дозвола од самиот корисник преку поставките на телефонот.
Сепак, италијанскиот регулатор смета дека начинот на кој се барала согласноста не бил доволно јасен и конкретен. Истрагата не го опфатила прашањето дали фотографиите биле користени за обучување на системи за вештачка интелигенција. Италијанските власти, сепак, најавиле дека одделно ќе ја разгледуваат и новата функција на „Мета“ од 2026 година, која овозможува обработка на содржините од галеријата преку облак.
Новата казна е уште еден сериозен проблем за компанијата на Марк Закерберг, која и претходно се соочуваше со истраги и санкции поради начинот на кој ги собира и обработува личните податоци на своите корисници.
