СКАНДАЛ ИЛИ ИСКРЕНОСТ – Принцот Хари прозборе за Чарлс и родителството

Принцот Хари, за време на посетата на Австралија, изјави дека неговата цел е да биде подобар родител од својот татко, кралот Чарлс III, истакнувајќи дека секоја нова генерација треба да ги унапредува методите на воспитување на децата.

Тој, како што пренесува „Телеграф“, нагласил дека нема намера да ги критикува своите родители, туку дека гледа на родителството како процес што природно се менува со времето и искуството.

„Родителството се развива со текот на времето. Децата нè подобруваат“, рекол Хари.

Тој додава дека денешните предизвици, особено социјалните мрежи, носат сосема нови ситуации кои претходните генерации не ги имале.

Тој повторил дека сака да го прекине циклусот на „генерациска болка“, нагласувајќи дека не постои вина или обвинување кон родителите за начинот на кој ги воспитуваат своите деца.

Во разговорот, Хари зборувал и за значењето на менталното здравје, истакнувајќи дека терапијата во Велика Британија и САД му помогнала да се справи со лични предизвици од минатото. Според него, барањето помош е знак на сила, а не слабост, и ги охрабрил луѓето да не чекаат криза за да побараат поддршка.

Зборувајќи за татковството, тој го опишал како најважната и најтрансформативната улога во животот на еден маж, која му дава смисла и одговорност.

Исто така открил дека за време на бременоста на неговата сопруга Меган Маркл водел дневник и на почетокот чувствувал одредена емоционална дистанца од својот син Арчи, но со помош на терапија успеал подобро да ја разбере својата улога во семејството.

На крајот, тој им порачал на новите татковци дека не се сами и дека е важно да ги прифатат емоционалните предизвици без осуда кон себе.