СИЈАРТО АЛАРМИРА Влезот на Украина ќе ѝ наштети на Европската унија

Унгарскиот министер за надворешни работи Петер Сијарто изјави дека Унгарија цврсто се спротивставува на забрзаното приклучување на Украина кон Европската унија, оценувајќи го како сериозен ризик за Унијата.

На маргините на Санктпетербуршкиот меѓународен економски форум (СПИЕФ), Сијарто порача:

„Тоа е многу опасно. Таквиот потег би предизвикал бројни проблеми и штети за Европската унија. Затоа, ние недвосмислено се противиме на ваков забрзан процес.“

Тој објасни дека нема логика Украина да напредува побрзо од земјите од Западен Балкан, кои веќе со децении го чекаат членството:

„Нема човек со здрав разум што би рекол дека Украина е во подобра позиција од било која држава од Западен Балкан. Овие земји во просек се на листата на чекање повеќе од 15 години.“

Сијарто нагласи дека проширувањето кон Западен Балкан би било од корист за Европската унија, додека интеграцијата на Украина, според него, би донела сериозни предизвици:

„Приемот на Украина во ЕУ не носи корист, туку тешкотии, штети и несигурности. Не сум сигурен дека Унијата е подготвена да се соочи со тие последици,“ заклучи тој.