СЕДУМ ДЕНА БЕЗ ТОВАРЕН СООБРАЌАЈ – Најавена целосна блокада на македонските граници

Од утре напладне, во наредните седум дена, ќе има целосна блокада на граничните премини за влез и излез на товарни возила. Камионските превозници од целиот Балкан најавија заеднички протест поради новиот систем на Европската Унија за евиденција на влез и излез, со кој, како што велат, неправедно им се скратува дозволениот престој на возачите.

Протестот го организираат транспортери од Србија, Босна и Херцеговина, Црна Гора и Македонија. Во земјава, сите гранични премини ќе бидат затворени за товарен сообраќај, додека автобусите и патничките возила ќе можат непречено да сообраќаат.

„Од наша страна ќе бидат затворени граничните премини Деве Баир, Делчево, Ново Село, Дојран, Богородица, Меџитлија, Ќафасан, Блато кај Дебар и Блаце. Табановце ќе остане отворено од македонска страна, но ќе биде блокирано од српските превозници“, изјави Билјана Муратовска од транспортната асоцијација „Макам-транс“.

Муратовска предупреди дека новиот систем, особено од 10 април кога целосно ќе започне електронското броење на деновите, ќе доведе до значително поскапување на транспортот и сериозни штети за економиите на целиот Западен Балкан. Таа посочи дека проблемите веќе се појавиле и околу 100 босански транспортери биле гонети од полицијата, приведувани и депортирани поради надминување на дозволениот престој од 90 дена, а слични случаи имало и со македонски превозници.

„Овие луѓе не се ниту терористи, ниту мигранти, а со нив се постапува како со најголеми криминалци“, реагира Муратовска.

Камионските транспортери велат дека се дискриминирани, бидејќи за сите други видови транспорт и авионски, бродски и железнички постојат исклучоци и олеснувања, додека за нив не. Според нив, решението е едноставно: и за возачите во патниот товарен сообраќај да важат истите отстапки како и за кабинскиот персонал во другите транспортни дејности.