СДСМ СЕ ФАЛИ СО РАСТ, НО КРИТИЧАРИТЕ УДРИЈА ПО ФИЛИПЧЕ Ја држи партијата во заложништво
Партијата тврди дека нејзиниот кандидат освоил 47 отсто повеќе гласови од 2025 година, додека организаторите на „Разговори за иднината во 12:05“ го посочуваат четвртото место како доказ за сериозни проблеми во раководењето со СДСМ.
Резултатите од предвремените избори за градоначалник во Брвеница предизвикаа нови политички препукувања, откако СДСМ објави анализа во која тврди дека поддршката за ВМРО-ДПМНЕ е намалена, додека нивниот кандидат бележи значителен раст на гласовите. Истовремено, организаторите на иницијативата „Разговори за иднината во 12:05“ упатија остри критики до раководството на СДСМ и претседателот Венко Филипче, оценувајќи дека изборниот резултат е показател за проблемите во партијата.
Од СДСМ велат дека кандидатот на ВМРО-ДПМНЕ, Стојанчо Радичевски, освоил 2.944 гласа, што е за 444 помалку од 3.388 гласа освоени на локалните избори во 2025 година. Според нивните пресметки, тоа претставува пад од околу 13 проценти. Од опозициската партија сметаат дека падот е уште поизразен ако се земе предвид дека Радичевски на овие избори ја имал поддршката и од ЗНАМ и од Левица.
„Падот на ВМРО е уште поголем, над 20% ако се има предвид дека и ЗНАМ и Левица го поддржаа кандидатот на ВМРО“, соопштија од СДСМ.
Од друга страна, нивниот кандидат Јовица Радески освоил 706 гласа, наспроти 481 глас на кандидатот на СДСМ на изборите во 2025 година. Тоа е зголемување од околу 47 проценти.
„Резултатите во Брвеница го потврдуваат трендот дека поддршката за ВМРО се намалува, а довербата во СДСМ расте“, оценуваат од партијата.
Премиерот Христијан Мицкоски претходно прогласи победа на ВМРО-ДПМНЕ во Брвеница, наведувајќи дека разликата во однос на СДСМ е поголема од четири спрема еден. По изборниот резултат се огласија и организаторите на иницијативата „Разговори за иднината во 12:05“, кои го обвинија раководството на СДСМ, предводено од Венко Филипче, за состојбите во партијата.
Според нив, освојувањето на четвртото место е последица на начинот на кој се води СДСМ, а наместо соочување со слабите резултати, раководството се обидува да ги претстави како успех. Тие му упатија честитки на кандидатот Јовица Радески за, како што наведуваат, достоинствениот настап во кампањата, но истовремено оценија дека резултатот не може да се толкува како успех на партијата.
Од „Разговори за иднината во 12:05“ посочуваат дека кандидатот на СДСМ во Брвеница освоил повеќе гласови само од двајца независни кандидати. Тие ја оспоруваат интерпретацијата на изборниот резултат од страна на партиското раководство, наведувајќи дека Јовица Радески добил 57 гласа помалку од советничката листа на СДСМ на локалните избори во 2025 година.
Организаторите изнесоа и обвинувања за наводни политички договори меѓу раководствата на СДСМ и ВМРО-ДПМНЕ, без во доставеното соопштение да бидат приложени докази за нив. Тие тврдат дека Филипче ја држи партијата во заложништво и бараат на следната седница на Централниот одбор да одговори на повеќе прашања поврзани со изборните резултати и иднината на СДСМ.
Меѓу прашањата што ги поставуваат организаторите се дали партиските анкети покажуваат дека СДСМ би можел да остане без пратенички мандат во Изборната единица 6, кој повторно ја актуелизирал идејата за влез на партијата во Владата на Христијан Мицкоски и зошто актуелното раководство сè уште не се повлекува од функциите.
Тие го повикаа Филипче да го прифати нивниот план за структурни реформи во СДСМ, оценувајќи дека изборните резултати во Брвеница се предупредување за состојбите во партијата.
Изборниот исход така отвори две различни политички толкувања: СДСМ го истакнува растот на гласовите за својот кандидат, додека критичарите од иницијативата „Разговори за иднината во 12:05“ го ставаат во преден план освоеното четврто место и бараат одговорност од партиското раководство.
