ПУТИН НАЈАВУВА МОЖЕН ДОГОВОР СО УКРАИНА, НО НЕ ОТСТАПУВА ОД ТЕРИТОРИИТЕ Тоа е историска Русија

Рускиот претседател Владимир Путин изрази увереност дека Русија и Украина можат да постигнат договор за мир, нагласувајќи дека Москва е подготвена да продолжи со трилатералните преговори за постигнување конечен договор.

„Целта на трилатералните преговори ќе биде постигнување договор за обезбедување на идната безбедност на Русија и Украина“, изјави Путин, пренесе РИА Новости.

Сепак, неговата изјава за можноста за мировен договор беше проследена со цврст став за територијалното прашање, кое останува една од клучните пречки за завршување на војната.

Коментирајќи ги изјавите на украинскиот претседател Володимир Зеленски за подготвеноста да се откаже од територија, Путин за порталот „Вести“ изјави дека станува збор за територии што Москва ги смета за историски руски.

„Тоа не се украински територии, туку историски руски територии“, порача рускиот претседател.

Изјавите на Путин покажуваат дека, и покрај најавената подготвеност за продолжување на преговорите, територијалните прашања и безбедносните гаранции ќе останат во центарот на евентуалните мировни разговори.