ПРОФЕСИОНАЛНИТЕ ВОЈНИЦИ КРЕНАА ГЛАС – Кривични пријави против високи армиски структури за злосторничко здружување

Независниот синдикат на професионални војници СО информира дека на 20 јануари 2026 година поднесе кривична пријава против 14 припадници на Армијата на Република Македонија, поради сомнение дека организирано и со однапред утврдена намера и цел нанеле материјална штета на припадници на Армијата, како и на државниот буџет.

Против наведените лица е поднесена пријава за сомнение за сторени следните кривични дела:
– Злоупотреба на службена положба и овластување (член 353 од Кривичниот законик),
– Злосторничко здружување (член 394 од Кривичниот законик) и
– Несовесно работење во службата (член 353-в од Кривичниот законик).

Кривичната пријава се однесува на 11 офицери и 3 подофицери на служба во Армијата, и тоа:
– командант на 1. пешадиска бригада со иницијали Д.Ч.,
– тројца вработени во ВП 7925 Петровец со иницијали И.И., З.Т. и М.Т.,
– командант на 2. пешадиски баталјон со иницијали З.С.,
– тројца вработени во ВП 7925/13 Штип со иницијали Т.С., М.Т. и И.А.,
– шест членови на дисциплински комисии вработени во ВП 7925 Штип со иницијали В.А., Ч.Н., Д.Ц., Д.Х., И.С. и С.К.

Во изминатиот период Синдикатот повеќепати апелираше за почитување на правата на припадниците на Армијата и за доследна примена на Законот за служба во Армијата. За жал, овие апели досега не вродија со резултат, а состојбата во која работат професионалните војници станува сè позагрижувачка.

Професионалните војници се работници во Армијата на Република Македонија и мора да бидат третирани со достоинство и почит, а не како лица без основни работнички права.

Во моментов, четворица генерали постапуваат незаконски кон Синдикатот и неговите членови, со цел опструирање и дискриминација на припадниците на Армијата. За секој од овие случаи, Синдикатот најавува поднесување соодветни пријави во наредниот период.

Упатуваме јавен апел до претседателката на Република Македонија и врховен командант на Армијата, г-ѓа Гордана Силјановска-Давкова, да ги преиспита одлуките за унапредувања во генералски чинови и поставувања на одговорни воени позиции, особено кога станува збор за лица кои го нарушуваат достоинството и честа на професионалните војници.

Како синдикат, речиси три години се соочуваме со постојани опструкции и од воените авторитети и од раководството на Министерството за одбрана, поради нашата борба за подобри работнички права, повисоки плати и подобри услови за работа.

Ова е петта кривична пријава по ред поднесена против вработени во Министерството за одбрана и Армијата. Очекуваме Основното јавно обвинителство да покаже поголем интерес и сериозност во постапувањето по овие пријави.

Јасно порачуваме: нема да застанеме тука.