ПРЕГОВОРИ ИЛИ ИЗМАМА – Иран открива што се крие зад потезите на Вашингтон

Иран е подготвен за можноста од нови воени судири, пренесува иранската новинска агенција Тасним, анализирајќи ги последните активности на Соединетите Американски Држави во регионот.

Според нивните наводи, во изминатите денови се забележува засилено присуство на американската војска, вклучувајќи движење на воени бродови, воспоставување „воздушен мост“ за транспорт на опрема, како и ангажман на тешки транспортни авиони како C-5 и C-17.

Дополнително, се споменуваат воени вежби поврзани со заземање остров во Бахреин, зголемена активност на извидувачки дронови и распоредување системи за воздушна одбрана.

Според анализата, Техеран разгледува две можни сценарија. Првото е дека Вашингтон врши психолошки притисок со цел да изнуди отстапки во преговорите. Иран, сепак, нагласува дека нема намера да попушти.

Второто сценарио, кое се смета за пореално, е дека дипломатските разговори служат како параван за подготовка на ненадеен воен удар, особено насочен кон иранските острови.

Иранската страна потсетува на претходни искуства и го обвинува Вашингтон дека ги користи преговорите како средство за манипулација.

Според Тасним, во Техеран во моментов преовладува проценката дека нов конфликт е поверојатен од дипломатско решение, при што се истакнува дека земјата е целосно подготвена за таков развој.

Во случај на напад врз инфраструктурата, Иран најавува дека би можел да се откаже од досегашната воздржаност и да одговори пошироко во регионот, вклучително и во чувствителни точки како Баб ел-Мандеб и енергетските капацитети на Блискиот Исток.