ПО ЖОЛТИОТ КУП ВО ШВАЈЦАРИЈА – Ракометната репрезентација замина во Данска на ЕП
Две победи и едно реми на меѓународниот турнир во Винтертур
Најдобрата машка ракометна репрезентација на Македонија денеска заминува од Швајцарија кон Данска.
Македонските ракометари го завршија своето учество на меѓународниот турнир „Жолт куп“, каде остварија две победи – над Бахреин со 32:28 и над Украина со 31:26, како и едно реми 29:29 против домаќинот Швајцарија.
На турнирот во Винтертур селекторот Кирил Лазаров заедно со стручното раководство имаше можност да испроба повеќе тактички варијанти кои ќе се користат на Европското првенство. Капитенот Филип Кузмановски, кој беше прогласен за најдобар играч на турнирот, го сподели своето видување за настапот.
Според претходниот план, пред почетокот на Европското првенство, македонската репрезентација ќе одигра уште еден контролен натпревар. Тимот ќе престојува во Силкеборг од денеска до 13 јануари, а вечерва е закажан и тренинг.
Шампионатот за Македонија ќе започне на 16 јануари со дуел против еден од главните фаворити за златото и ко-домаќин на првенството Данска. Следни противници ќе бидат Португалија на 18 јануари и Романија на 20 јануари.
Целта на македонскиот тим е да заврши меѓу првите две селекции во групата и да обезбеди пласман во втората, главна фаза на првенството. Иако задачата нема да биде лесна, со големата поддршка од македонските навивачи, ракометарите ќе имаат шанса да покажат дека располагаат со квалитет за уште поголеми резултати.
