ОТКРИЕНО КОЈ Е ВИНОВЕН ЗА СООБРАЌАЈКАТА СО ПЛЕНКОВИЌ Детали од полициската истрага што не беа познати

Полицијата во Загреб ја заврши истрагата за сообраќајната несреќа во која минатата недела учествуваа две службени возила од придружбата на хрватскиот премиер Андреј Пленковиќ. Утврдено е дека за судирот е одговорен полицаецот кој го управувал второто возило, пренесува „Јутарњи лист“. Според полицискиот извештај, првото возило од колоната ја сменило сообраќајната лента и продолжило по делот наменет за јавен превоз, поради забавеното движење предизвикано од колона возила.

Пристигнувајќи до раскрсницата, возачот забавил за да ги помине заштитните столпчиња кои го одделуваат коловозот од трамвајските шини. Во тој момент второто полициско возило не успеало навреме да запре и удрило во задниот дел од првото возило. Истрагата покажала дека двете возила имале вклучени ротациски светла и звучна сигнализација, а алкотестирањето не покажало присуство на алкохол кај возачите. Во несреќата немало повредени лица.

Полицијата соопшти дека возачот кој го предизвикал судирот добил казна за сообраќаен прекршок и ја платил предвидената глоба. Иако автомобилите по ударот останале во возна состојба, тие засега не се користат поради претрпената материјална штета. Точната вредност на оштетувањето ќе биде позната по завршувањето на проценката и поправката.

Несреќата се случила на 2 јули, по седницата на хрватската Влада одржана во Националната и универзитетска библиотека во Загреб. Тогаш беше потврдено дека во инцидентот учествувале само возила од премиерската придружба, без други учесници во сообраќајот. На фотографиите од местото на несреќата се гледаше дека во еден од автомобилите бил премиерот Андреј Пленковиќ, а на возилото биле активирани воздушните перничиња.

Министерот за внатрешни работи на Хрватска, Давор Божиновиќ, по инцидентот изјави дека нема повредени и дека Пленковиќ продолжил со своите редовни активности и покрај сообраќајката.