ОХРИД СТАНУВА ЦЕНТАР НА СВЕТСКИОТ ЏЕЗ Шест концерти, големи имиња и музика од седум земји

Охрид летово добива нова музичка приказна. Од 13 до 16 август, во рамките на фестивалот „Охридско лето“, за првпат ќе се одржи програмата „Џез-вечери“, во организација на Радио „Џез ФМ“ и НУ „Охридско лето“.

Во уникатниот амбиент на црквата „Света Софија“ и на сцената Долни Сарај ќе бидат одржани шест концерти на музичари од САД, Германија, Грција, Гана, Холандија, Велика Британија и Македонија.

Програмата започнува на 13 август во „Света Софија“ со концертната промоција на албумот „Orthodoxia Kai Thanatos“ на македонскиот пејач, гитарист и композитор Крсте Роџевски, кој со години е дел од авангардната њујоршка даунтаун сцена. На концертот ќе настапи со Христијан Моневски, Дамјан Палоски, Андреа Мирческа и Оливер Јосифовски.

Истиот ден ќе настапи и Дине Донеф со своето трио, во кое се Харис Ламбракис и Кирјакос Тапакис. Донеф, односно Костас Теодору, е композитор, контрабасист и мултиинструменталист, познат по музичкиот спој на балканската традиција, импровизацијата и современиот џез.

На 14 август на сцената Долни Сарај ќе настапи Националниот џез-оркестар со програмата „Македонски сновиденија“, под диригентската палка на Владимир Николов. Концертот претставува спој на македонскиот фолклор и современиот џез, а специјален гостин ќе биде трубачот Питер Сомуа од Гана, кој живее и работи во Ротердам.

Сомуа ќе настапи повторно на 15 август, овојпат со својот состав, во кој современиот џез се преплетува со африканските ритми и мелодии.

Истата вечер публиката ќе има можност да ја слушне и Нубаја Гарсија со својот квартет. Британската саксофонистка и композиторка е една од најзначајните имиња на новата лондонска џез-сцена, а во својот препознатлив звук ги спојува современиот џез, карипските традиции, афробитот, дабот и електронските влијанија.

„Џез-вечери“ ќе завршат на 16 август со настапот на британскиот состав „Kiioto“, проект на музичарите Лу Роудс и Роан Хит. Нивната музика ги поврзува џезот, електрониката, соулот, трип-хопот, амбиенталната музика и современиот поп.

Со шест концерти и музичари од повеќе земји, новата програма на „Охридско лето“ има амбиција да го претвори Охрид во една од атрактивните точки на европската џез-сцена во август.