ОД 1 ЈАНУАРИ ЗДРАВСТВОТО ПОСКАПО Партиципацијата скокна и до 50%

Од 1 јануари, граѓаните ќе бидат обврзани да плаќаат повисока партиципација за здравствени услуги, најави директорот на Фондот за здравствено осигурување (ФЗО), Сашо Клековски. Иако ја оцени како „симболична“, промената ќе резултира со зголемување на цените на некои услуги и до 50%, а кај некои дури и повеќекратно.

Така, услугата која досега чинеше 40 денари, од Нова година ќе чини 60 денари. Специјалистички преглед со земање брис, кој досега беше 400 денари, сега ќе се наплаќа 750 денари. Општиот ургентен пакет, кој досега беше 780 денари, ќе поскапи на 2.450 денари, а ехо-преглед на еден орган, кој досега чинеше 300 денари, ќе се зголеми на 670 денари.

Клековски објасни дека оваа одлука следи по повеќе од десет години без промена на цените и се однесува на основниот специјалистички и интернистички пакет. Специјалистичкиот преглед, кој до сега беше 380 денари, ќе поскапи на 720 денари. Ова зголемување ќе донесе дополнителни околу една милијарда денари годишно за здравствените установи, од кои 80% ќе бидат распределени на јавниот, а 20% на приватниот сектор.

Интернистичкиот пакет ќе донесе дополнителни 340 милиони денари годишно.

Директорот на ФЗО нагласи дека не се воведуваат нови пари, туку се врши подобра валоризација на веќе извршената работа. Според него, здравствените установи често не успевале да го исполнат својот буџет поради ниските цени на услугите, а со зголемувањето на цените се овозможува поголема реализација на нивниот буџет.

„Установите често фактурираат услуги кои не се целосно реализирани, најчесто помалку од 80%. Со овие нови цени, ќе се овозможи подобро вреднување на нивната работа“, рече Клековски.

Сепак, најавеното зголемување на цените доаѓа во време кога граѓаните веќе се соочуваат со повисоки трошоци за живот. Иако премиерот претходно изјави дека зголемувањето на платите може да предизвика инфлација, во пракса цените на бројни услуги поврзани со државата – како што се струјата, парното и храната – веќе се зголемени. Плус, се најавува и поскапување на градинките.

Во вакви услови, новите цени на здравствените услуги, особено за ургентните прегледи, би можеле да се претворат во дополнителен финансиски товар за дел од граѓаните, а за некои дури и во луксуз.