ОБДУКЦИЈАТА ОТКРИ ОД ШТО ПОЧИНА ФУДБАЛЕРОТ ПО СТРАШНИОТ СУДИР Истрагата продолжува, голманот се повлече од јавноста

Првите резултати од обдукцијата на шпанскиот фудбалер Хесус де Мигел (30), кој почина по жестокиот судир со голманот на Андора, Хесус Овоно, укажуваат дека смртта настапила како последица на трауматска повреда на градниот кош. Повредата е означена како последица на несреќен случај, но истрагата сè уште не е завршена.

Според шпанскиот весник „Дихарио де Ависос“, обдукцијата ја извршиле експерти од Институтот за судска медицина и форензички науки во Санта Круз де Тенерифе. Прелиминарниот извештај му бил доставен на судијата Ева Естер Хуарез Фернандез, која ја води постапката.

Се очекуваат дополнителни лабораториски анализи, вклучително и токсиколошки наоди, како и детална проверка на медицинската документација од периодот на хоспитализацијата. Поради тоа, конечниот медицински заклучок сè уште не е донесен.

Шпанската Национална полиција, под надзор на правосудните органи, ги испитува сите околности поврзани со трагедијата. Покрај самиот судир, истражителите проверуваат како била организирана медицинската интервенција на теренот.

Посебно внимание се посветува на времето потребно за изнесување на фудбалерот од теренот, транспортот до болницата и постапките за реанимација.

Засега нема официјална потврда дека медицинските екипи направиле пропуст. Исто така, фактот што е покрената судска истрага не значи дека голманот Овоно е прогласен за виновен или дека против него е утврдена кривична одговорност.

Трагедијата остави тешки последици и врз голманот на Андора, Хесус Овоно. Според информациите на „Ројтерс“, тој не е вклучен во составот на репрезентацијата на Екваторијална Гвинеја за претстојните натпревари против Зимбабве.

Неговото изоставување доаѓа во период кога голманот минува низ исклучително тежок психолошки период. Според шпанскиот весник „Ел Паис“, Овоно се повлекол од јавноста, не присуствувал на тренингот на Андора и моментално престојува дома со својата партнерка.

Тој го деактивирал и профилот на Инстаграм по бројните навреди и обвинувања на социјалните мрежи. Клубот се обидува да го заштити од притисокот, а неговите соиграчи му дадоа поддршка, нагласувајќи дека никогаш намерно не би повредил противнички фудбалер.

Кобниот инцидент се случи на 2 ноември, на натпреварот меѓу Тенерифе и Андора од втората шпанска лига.

Во судиското продолжение, Овоно истрча далеку од својот гол за да интервенира на една топка, но силно се судри со напаѓачот на Тенерифе, Хесус де Мигел. При контактот, голманот го удрил фудбалерот во пределот на градите и лицето, по што тој паднал на тревникот без свест.

Овоно доби директен црвен картон, а медицинските екипи веднаш започнаа интервенција. Де Мигел бил реанимиран и пренесен во болница, но подоцна дошло до сериозно влошување на неговата состојба. Починал на 3 ноември наутро, на 30-годишна возраст.

По трагичната вест, семејството, соиграчите и фудбалската јавност се простија од Де Мигел. Сопственикот на Андора, Жерард Пике, исто така упати порака на сочувство.

Шпанскиот суд одобри пренос на посмртните останки во провинцијата Толедо, од каде што потекнува семејството на фудбалерот. Погребот е планиран во Навахермоса, а Тенерифе најави посебен омаж на стадионот „Елиодоро Родригез Лопез“ на 7 ноември.

Додека семејството и фудбалскиот свет тагуваат по загубата на 30-годишниот напаѓач, истрагата продолжува. Конечните наоди треба да дадат одговори за сите околности што доведоа до трагичниот исход.