НОВ УДАР ОД ТРАМП – САД воведоа санкции и против шефицата на Меѓународниот кривичен суд

САД воведоа санкции против Томоко Акане, јапонската судијка и претседателка на Меѓународниот кривичен суд (МКС), соопшти американското Министерство за финансии. Одлуката претставува нова ескалација во притисокот на администрацијата на Доналд Трамп врз судот со седиште во Хаг.

МКС е основан во 2002 година со цел да гони лица за воени злосторства, геноцид и злосторства против човештвото. САД не се членка на судот, но администрацијата на Трамп остро се спротивставува на неговите постапки, особено на издадените налози за апсење на израелскиот премиер Бенјамин Нетанјаху и поранешниот министер за одбрана Јоав Галант.

Во текот на минатата година Вашингтон веќе воведе санкции против повеќе обвинители и судии на МКС. Со санкциите се замрзнува имотот на засегнатите лица во САД и практично им се ограничува пристапот до американскиот финансиски систем.

Во јуни тројца судии на МКС поднесоа тужба против Трамп и неговата администрација, оценувајќи дека санкциите се незаконски. Министерството за финансии сега издаде и општа лиценца со која се овозможува постепено прекинување на трансакциите поврзани со Акане до 17 септември.

Американскиот државен секретар Марко Рубио минатиот месец најави дека Вашингтон ќе ги засили мерките против МКС, вклучително и дипломатски напори за убедување на други држави да ја напуштат институцијата.

Рубио тврди дека МКС претставува закана за американскиот персонал поради неговите истраги поврзани со американските воени активности и други операции. Според откритија на „Ројтерс“, дел од санкциите биле насочени и кон спречување идни обиди за повикување на одговорност на Трамп или негови претставници за американски воени операции во странство.

Иако САД не се членка на МКС, судот може да има надлежност за сериозни злосторства извршени на територијата на земји-членки, дури и кога сторителите се државјани на држави кои не се дел од судот.