НЕОЧЕКУВАН ПРЕСВРТ Куба ги отвора вратите за приватници и странци, почнува економска револуција
Дијаз-Канел вели дека реформите се одговор на „сегашното време“ и економскиот притисок.
Кубанскиот претседател Мигел Дијаз-Канел денеска неочекувано објави пакет економски реформи, во услови на зголемен притисок од САД и продлабочена економска криза на островот.
Реформите предвидуваат проширување на дозволените активности за приватниот сектор и отворање на туристичката индустрија за нови домашни и странски актери. Објавата доаѓа во период на сериозна економска нестабилност и зголемени тензии со Вашингтон, пренесуваат меѓународни медиуми.
Дијаз-Канел истакна дека промените се неопходни за да одговорат на „барањата на современото време“, притоа обвинувајќи ја американската политика за „мултидимензионален притисок“ врз Куба. Тој нагласи дека државата продолжува да функционира и покрај тешките услови.
Реформите се дел од Економската и социјална програма за 2026 година и ќе бидат доставени на одобрување во Националното собрание во јули.
Меѓу клучните мерки се издвојува намалување на ограничувањата за приватни компании, како и поголема слобода за деловно работење во повеќе сектори. Во туризмот се најавува влез на „нови актери“ со цел подобро искористување на постојната инфраструктура, откако дел од странските хотелски синџири се повлекоа од земјата.
Во економските планови се предвидува и укинување или реорганизација на државните увозни посредници за да се забрза надворешната трговија и да се поттикнат странските инвестиции.
Посебен фокус е ставен на енергетскиот сектор, каде Куба се соочува со сериозен недостиг на гориво и електрична енергија. Владата планира поголемо вложување во обновливи извори и намалување на зависноста од фосилни горива.
Дијаз-Канел ја обвини американската „енергетска блокада“ за тешката состојба, тврдејќи дека во последните месеци во земјата пристигнал само ограничен број нафтени пратки.
Реформите вклучуваат и намалување на државната администрација, со цел намалување на трошоците и пренасочување на средства кон социјални програми и зголемување на платите.
Во меѓувреме, САД продолжуваат со заострување на санкциите кон Куба, вклучително и против државни компании и функционери, што дополнително ги влошува односите меѓу двете земји.
