НЕ МИ ТРЕБААТ 60 ГОЛА Мурињо со јасна порака за Мбапе
Португалецот откри каков Мбапе сака да гледа во Реал Мадрид и што му е поважно од личните бројки.
Реал Мадрид продолжува со максимален учинок на стартот од новата сезона. По победата над Еспањол во првото коло, „Кралевите“ на „Сантијаго Бернабеу“ го совладаа Реал Сосиедад со убедливи 4:1. Домашниот тим не блескаше во првото полувреме, но по паузата целосно го презеде натпреварот и стигна до заслужен триумф.
Во центарот на вниманието беше Килијан Мбапе, кој постигна три гола и одигра одличен натпревар. По дуелот, тренерот Жозе Мурињо имаше само пофални зборови за францускиот напаѓач.
„Мбапе беше неверојатен. Сите ја знаеме неговата способност да постигнува голови, но најмногу ме импресионираше начинот на кој реагира кога тимот се мачи. Се повлекува, се поврзува со соиграчите и работи за тимот да создаде предност и закана пред голот. Тоа беше одличен настап со многу квалитетни индивидуални изданија“, изјави Мурињо.
Португалецот потоа беше замолен да направи споредба меѓу Мбапе и Кристијано Роналдо, но избегна директно споредување.
„Не сакам да споредувам играчи, но Мбапе е неверојатен. Многу сум среќен што влезе во историјата на Светското првенство. Многумина го освоиле Светското првенство, но само еден останува вечен во фудбалот, оној со најмногу голови“, рече Мурињо.
Тој нагласи дека Мбапе има голема желба да остави трага во историјата на Реал Мадрид.
„Тој е гладен да влезе во историјата со Реал. Освен Килијан, видов и добар тим, и покрај тешкотиите во првото полувреме. Знаевме како да играме, да чекаме, да останеме смирени и компактни. Ја задржавме топката, а во второто полувреме успеавме целосно да го активираме тимот“, додаде тренерот.
На прашањето дали Мбапе може да постигнува 50 или 60 гола по сезона како Роналдо, Мурињо даде јасен одговор:
„Би претпочитал 40 гола со многу напорна работа за тимот и освоени трофеи, отколку 60 само за себе. Многу сум задоволен од него“.
Мурињо зборуваше и за своето враќање на „Сантијаго Бернабеу“, стадион на кој во минатото го предводеше Реал Мадрид.
„Бернабеу е уште поубав отколку што беше. Победата е фантастична. Пред натпреварот бев смирен, бидејќи поминаа многу години. Имам одлични играчи кои ми овозможија да уживам и како тренер и како човек кој го сака фудбалот“, заклучи Мурињо.
https://nacionalno.mk/muri-o-se-vra-a-vo-real-platena-otshteta-od-15-milioni-evra/
