НЕ МЕ ЗАШТИТИВТЕ – Рамиз Мерко со шокантни обвинувања кон својата партија

Поранешниот градоначалник на Струга, Рамиз Мерко, реагираше јавно обвинувајќи за, како што наведува, двојни стандарди и селективна правда во односот кон поранешни функционери, при што ја споменува и својата матична партија ДУИ.

Во својата објава тој истакнува дека ги следел реакциите на ДУИ поврзани со наводни политички притисоци врз поранешни функционери како Блерим Беџети и Фатмир Дехари, но прашува зошто, според него, ист пристап не бил применет и во неговиот случај. Со тоа алудира на различен однос на партијата кон сопствените кадри.

Мерко нагласува дека принципите на еднаква правда и ненамешување на политиката во институциите се исправни, но мора да важат подеднакво за сите, бидејќи во спротивно се создава впечаток на селективност.

Тој потсетува дека повеќе од две децении бил активен во политиката и имал удел во изборните резултати, но при соочување со судски процеси, наместо поддршка, добил дистанцирање и негирање на поврзаноста со партиските структури. Според него, постапките против него не се однесувале на корупција или финансиски криминал, туку на административни и институционални прашања.

Во објавата додава дека, според неговото гледиште, додека неговиот случај бил третиран рестриктивно, кај други функционери имало повнимателен или заштитнички пристап, што дополнително ја потврдувало селективноста.

Мерко заклучува дека ова не е прашање на поединци, туку на принципи, нагласувајќи дека правдата мора да биде еднаква за сите, и изразува поддршка за поранешни функционери кои, како што вели, се соочуваат со политички мотивирани процеси.

ДУИ, која по парламентарните избори во 2024 година се наоѓа во опозиција, се соочува со зголемени внатрепартиски критики од поранешни високи функционери, меѓу кои и Мерко.