НАФТАТА ЗА ЕУ ПОСКАПЕ ЗА 55,8 ОТСТО Количините речиси непроменети
САД и Норвешка остануваат клучни снабдувачи, додека Велика Британија ја надмина Русија кај гасот.
Во вториот квартал од 2026 година, увозот на нафта во Европската Унија значително поскапел, иако увезените количини останале речиси непроменети. Според податоците на „Евростат“, вредноста на увезената нафта пораснала за 55,8 отсто, додека количината изнесувала околу 36,7 милиони тони.
Кај течниот природен гас (LNG), вредноста на увозот се зголемила за 4,1 отсто, но увезените количини се намалиле за 5,6 отсто.
Спротивно на тоа, увозот на природен гас во гасовита состојба бележи раст и по вредност и по количина. Вредноста се зголемила за 18,5 отсто, а обемот на увозот за 3,4 отсто.
Во вториот квартал од годината, САД и Норвешка останале меѓу најзначајните снабдувачи на енергенси за ЕУ.
Кај нафтата, најголем удел имале САД со 18,8 отсто, пред Норвешка со 14,3 отсто и Казахстан со 13,4 отсто.
САД доминирале и кај увозот на течен природен гас, со 63,2 отсто од вкупниот увоз. Од Русија пристигнале 17,3 отсто, додека 8,1 отсто од увозот бил од Алжир.
Кај природниот гас во гасовита состојба, Норвешка била убедливо најголем снабдувач со 51,2 отсто, следена од Алжир со 18,2 отсто.
На третото место се најде Обединетото Кралство со 11,1 отсто, со што ја надминало Русија, која учествувала со 10,2 отсто од увозот на ЕУ.
