МОДАТА ВЕЌЕ НЕ Е САМО ТРЕНД – Еве како ја менува економијата, културата и политиката

Модата повеќе не е само она што го гледаме. Таа е она што стои зад тоа. Втората вечер од 32. издание на Fashion Weekend Skopje powered by UNIBank ја помести сцената од традиционалната писта кон системот, каде креативноста, економијата и културната дипломатија повеќе не се одвоени категории.

Денот започна со UNIBank Fin Talk, под модерација на Ирина Михајлова, каде финансиската писменост беше поставена во сржта на личната слобода. Разговорот ги поврза дигиталната генерација и институционалниот систем, отварајќи дискусија за контрола како предуслов за избор. Луна Стефановска зборуваше за создавање вредност во дигиталниот простор, Ема Станковиќ ја позиционира банката како партнер, а дизајнерот Ѓеоргиј Петрушев ја потенцира потребата од финансиска поддршка за креативниот труд. Пораката беше јасна: финансиската слобода започнува не со повеќе пари, туку со контрола над тие што ги имаш.

Пистата потоа ја презедоа студентите од насоката за моден дизајн на Факултетот за уметност и дизајн при Меѓународниот Балкански Универзитет, покажувајќи дека новата генерација веќе создава. Тие го истражуваат процесот, прифаќајќи недовршеност како дел од учењето, а токму во тоа се крие нивната вредност – не во финалниот производ, туку во откривањето на новиот авторски глас.

Во рамки на MISSION4WATER, во соработка со Текстилното трговско здружение – Текстилен кластер, се отвори темата за микропластиката. Наташа Сивевска и проф. д-р Гордана Вренцоска ја поместија дискусијата од симптомот кон системот, истакнувајќи како дизајнот може да интервенира уште во почетната фаза на производството.

Со #MadeWithSweden Public Talk, преку онлајн платформа и со поддршка на Bergstrand Consultancy, локалната сцена се поврза со нордискиот контекст, нагласувајќи ја одржливоста како системска пракса, а не како краткотраен тренд. Модната индустрија повеќе не познава географски граници.

Кулминацијата дојде со јавен разговор и отворањето на изложбата „Зелена и одржлива мода: нордиско-балтичка приказна“, организирана од Амбасадата на Шведска во Северна Македонија, во партнерство со амбасадите на Данска, Финска, Литванија и Норвешка, во соработка со Македонското модно здружение и со поддршка од Нордискиот совет на министри.

Под модерација на Ирина Михајлова, разговорот ги отвори прашањата за улогата на амбасадорите и потенцијалот за долгорочни партнерства со Западен Балкан. Во вториот дел, менторката на резиденцијата, Ирина Тошева, дискусијата ја пренасочи кон практичната примена, прикажувајќи како одржливоста се имплементира како метод на работа.

Изложбата не беше само визуелна презентација и таа беше резултат на разговорот. Делата на нордиско-балтичките и македонските дизајнери ја истакнаа свесноста за ресурси, прецизноста и минимализмот како заедничка точка.

Ревиите што следеа делуваа како логично финале на 32. издание.

Терзија, со поддршка на ZIA Jewelry и Душа Винарија, ја претстави колекцијата „Вртлог“ и студија за балансот меѓу структура и сензуалност, каде накитот е фин, но промислен акцент.

Во рамки на 11th MetFashion Day – Past2Future Fashion, Милица Ѓуриќ, Лана Михајловиќ, Јана Станишиќ, Лена Матиќ и Андреа Булајиќ ги претставија своите колекции како дел од платформа што создава автори, а не трендови. Курирани од Милица Слијепчевиќ и Лидија Јовановиќ, ревиите ги прикажаа енергиите на новата генерација со јасна насока.

GEORGIYA „Season IV“ донесе поинтимен ритам со чисти линии и внимателно редуцирана палета, каде секој елемент има своја функција.

Финалето му припадна на Роберт Ивановски, со поддршка на Винарија Душа, кој ја затвори вечерта со колекција што носи авторитет без да инсистира на него. Формите беа понагласени, целината конзистентна и без компромиси.

Модата денес не е доволна сама по себе. Таа е пресек на економија, образование, култура и политика.

Денес веќе не прашуваме што носиме и прашуваме што градиме.

32. издание на Fashion Weekend Skopje powered by UNIBank даде одговор. Програмата ќе продолжи со содржини насочени кон иднината на модната индустрија, со акцент на 3D и AI технологии, нови студентски презентации и завршни ревии.