МИЦКОСКИ ОСТАНА БЕЗ АРГУМЕНТИ Ја вади картата „Талог“ по моделот на Ванчо Михајлов

Наместо Денот на независноста да биде повод за единство, заедништво и прослава на државноста, вчерашниот 8 Септември, според СДСМ, премиерот Христијан Мицкоски го искористил за продолжување на политичките поделби и реториката со која, како што велат од партијата, се навредуваат и делат граѓаните.

Од СДСМ оценуваат дека кај Мицкоски нема државнички пристап, ниту доволно чувство за значењето на 8 Септември и независноста на државата.

„Операцијата ‘Талог’ и сеењето омраза што Мицкоски ја спроведува е класична фашистичка кампања, по моделот на Ванчо Михајлов и најмрачните периоди од нашата историја“, обвинуваат од опозициската партија.

Од СДСМ со низа обвинувања до Владата

Опозициската партија посочува неколку случаи со кои, според нив, се потврдува тезата дека власта создава атмосфера на притисок и поделби.

Од СДСМ тврдат дека најпрво било ограничено јавното зборување за мигрантите, наведувајќи дека во Собранието бил донесен декрет кој го споредуваат со политиките од времето на Хитлер.

Како пример го посочуваат и случајот во Ново Село, каде, според нив, биле нападнати деца поради транспарент поврзан со проблемот со загадената вода во Гостивар.

Во истата насока го наведуваат и случајот со советник на СДСМ од Кавадарци, кој, како што тврдат, бил повикан во полициска станица поради објава на Фејсбук поврзана со незадоволството на лозарите.

„Немаат резултати, па создаваат поделби“

Од СДСМ сметаат дека ваквата политичка реторика е резултат на недостатокот на конкретни резултати на Владата.

„Оваа форма на кампања Мицкоски ја тера само затоа што нема ниту еден резултат зад себе, во ниту една област“, велат од партијата.

Како области во кои, според нив, состојбата е лоша ги наведуваат економијата, земјоделството, здравството, образованието и социјалната политика.

„Народот едвај врзува крај со крај“

Од СДСМ особено ја потенцираат економската состојба и стандардот на граѓаните.

Според нивните тврдења, потрошувачката кошничка со вклучена кирија достигнала околу 90.000 денари, додека минималната плата изнесува 26.000 денари.

„Цените отидоа до плафон, стандардот на граѓаните паѓа, а луѓето живеат сè потешко“, обвинуваат од опозицијата.

Партијата дополнително тврди дека јавниот долг за време на мандатот на Мицкоски е зголемен за околу четири милијарди евра.

Европскиот пат и политиките на Владата повторно на удар

Од СДСМ го обвинуваат Мицкоски и за застој на европскиот пат на државата, како и за политики кои, според нив, се спротивни на европските вредности.

Во тој контекст го посочуваат и чествувањето на Ратко Младиќ, оценувајќи го како спротивно на европските и човечките вредности.

„Сè што се прави е копи-пејст рецепт од неговиот ментор Вучиќ“, стои во реакцијата на СДСМ.

„Патриотските теми веќе не поминуваат“

Опозицијата тврди и дека Мицкоски бележи пад на политичката поддршка, посочувајќи дека веќе изгубил повеќе од 150.000 гласови и прогнозирајќи дополнителен пад на неговиот личен рејтинг.

„Патриотските теми веќе не поминуваат, сите се прочитани“, велат од СДСМ.

Според опозициската партија, кога нема резултати и кога, како што тврдат, „сите негови лаги се прочитани“, на Мицкоски му останува само политиката на поделби и создавање омраза.

„Кога нема резултати зад себе, кога сите негови лаги се прочитани, само уште тоа му остана на Мицкоски – поделби и сеење омраза“, порачуваат од СДСМ.