МИЦКОСКИ НА САМИТ ВО ТИРАНА – Нашиот пат кон ЕУ
Собирот во Тирана ја поттикнува размената на искуства меѓу земјите од Западен Балкан
Премиерот Христијан Мицкоски денеска учествуваше на Самитот „Нашиот пат кон ЕУ“ во Тирана, Албанија. Според него, собирот претставува важна можност за продлабочување на дијалогот и зајакнување на заедничките напори на земјите од Западен Балкан во процесот на приближување кон Европската Унија.
„Нашата земја останува цврсто посветена на европските интеграции и регионалната соработка, кои се клучни за заедничката визија за просперитетен Западен Балкан“, напиша на фејсбук Мицкоски.
Самитот во Тирана служи како платформа за размена на искуства, јакнење на соработката и координирање на политики со цел унапредување на економската, политичката и безбедносната стабилност во регионот.
Предвидено е премиерот Мицкоски да се обрати на панел дискусијата насловена „Исполнување на заеднички обврски, резултати и забрзување“.
На Самитот во Тирана, покрај лидерите на земјите од Западен Балкан, присуствува и еврокомесарката за проширување Марта Кос.