МАЛОЛЕТНИОТ УБИЕЦ ОД РИБНИКАР Планирал да убие повеќе соученици

Малолетниот убиец К.К., кој на 3 мај 2023 година изврши масакр во основното училиште „Владислав Рибникар“ во Белград, можел да убие повеќе соученици ако не му се стеснела свеста во критичниот момент. Ова го потврдуваат судските вештаци кои сведочеа на рочиштето против неговите родители, Миљана и Владимир Кецмановиќ, по приватна тужба од родителите на една од жртвите. Кецмановиќ, во својот крвав поход, уби обезбедувачот на училиштето и девет соученици, а неколку други беа повредени.

Според вештаците, вклучувајќи психијатар и психолог, К.К. бил способен да расудува и да ги контролира своите постапки во моментот на масакрот. Вештакот Миодраг Станковиќ истакна дека малолетникот бил свесен за своите дејствија, но краткотрајно имал стеснување на свеста. Тој проценил дека К.К. би убил повеќе луѓе ако не му се случило тоа стеснување, бидејќи во моментот кога поминувал покрај прозорецот, одлучил да го запре продолжувањето на злосторството.

Наодите на вештаците укажуваат на тоа дека К.К. внимателно го планирал злосторството и истражувал какви ќе бидат санкциите за масовно убиство. Тој не само што го анализирал Кривичниот законик на Србија, туку и како се третираат слични злосторства во други земји, со цел да направи „големо и тешко дело“. Според Станковиќ, малолетникот исто така имал план за заштита на својот живот, предавајќи се без оружје, кое го фрлил подалеку во училишниот двор.

К.К. изјавил дека прво го убил чуварот на училиштето, потоа две дежурни ученички и уште едно девојче пред тоалетот. Иако експертите велат дека момчето не се сеќава на сите детали од злосторството, вештакот Анета Лакиќ укажа на сомнителноста на неговото губење на меморијата, бидејќи негирал дека видел крв, тврдејќи дека пукал само во тела. Снимката од безбедносната камера не покажува дека К.К. бил во паника.

Според српските закони, малолетниот К.К. не може да одговара кривично, бидејќи во моментот на масакрот немал 14 години. Семејствата на жртвите најавија иницијатива до Министерството за правда за измени на Кривичниот законик и Законот за малолетни сторители, со цел да се намали границата за кривична одговорност од 14 на 12 години.