МАКЕДОНИЈА СТАРТУВАШЕ ФУРИОЗНО – Убедливо против Азербејџан 87-49
Следна станица е Даблин каде Македонија на 30 ноември го игра вториот натпревар од претквалификациите за ЕП 2029
Македонската кошаркарска репрезентација стартуваше фуриозно во претквалификациите за Европското првенство 2029, декласирајќи го Азербејџан со убедливи 87-49 во СРЦ „Кале“. Со оваа доминантна победа, „црвено-жолтите“ испратија јасна порака дека се фаворити во својата група.
Од самиот старт, македонските кошаркари демонстрираа сила, а новиот лидер на тимот, Андреј Јакимовски, покажа зошто игра во Италија. Јакимовски заврши со фантастичен дабл-дабл: 25 поени и 11 скокови, додека капитенот Војдан Стојановски исто така имаше двоен учинок со 16 поени и 11 скокови, доминирајќи под обрачите.
Дебито на натурализираниот играч Омари Мур донесе скромни 6 поени, но тој се покажа како важен тимски играч, со 9 асистенции и 6 скокови, целосно во служба на колективот. Одличен беше и Лејсон Зеќири, кој со 17 поени го заврши мечот со атрактивно забивање.
Следната станица на македонската репрезентација е Даблин, каде што на 30 ноември ќе го одигра вториот натпревар од овој претквалификациски циклус против Ирска.
