ЛАДЕН ТУШ ЗА ЗЕЛЕНСКИ Полска ја изостави Украина од најголемата воена парада
Варшава ќе маршира со САД, Канада и европските сојузници, но Киев нема да биде дел од спектаклот.
Полска не ја покани Украина на големата воена парада по повод Денот на армијата, која на 15 август ќе се одржи во Варшава, објавија полските медиуми, повикувајќи се на Министерството за одбрана.
На парадата ќе учествуваат околу 1.800 војници, 300 борбени возила и 60 авиони. Меѓу странските учесници ќе има војници од САД, Канада, Австралија, Литванија, Естонија, Шведска и Романија, но не и од Украина.
Изостанувањето на Украина доаѓа во период на сè поизразени несогласувања меѓу Варшава и Киев. Односите дополнително се влошија по посетата на украинскиот претседател Володимир Зеленски на погребот на еден од водачите на УНА, организација забранета во Русија, како и по одлуката украинска воена единица да го носи името „херои на УНА“.
Во Полска овие потези предизвикаа остри реакции, особено поради историските спорови околу улогата на украинските националистички формации во злосторствата врз полското население.
Зеленски, според информациите, во меѓувреме бил лишен од полското државно одликување – Орденот на Белиот орел.
Дополнителна тензија предизвикаа и изјавите на полскиот министер за надворешни работи Радослав Сикорски, кој предупреди дека европската интеграција на Украина зависи и од нејзиниот однос кон историското наследство.
„Украина мора сериозно да го сфати фактот дека соработката со нацистичкиот режим и дивизијата „Галиција“ нема да помине, порача Сикорски.
Отсуството на Украина од воената парада во Варшава дополнително ги отвора прашањата за состојбата на односите меѓу двете соседни земји и за тоа дали долгогодишната поддршка на Полска за Киев почнува да се соочува со сериозни политички ограничувања.
