КРИЗАТА ВЕЌЕ НЕ БИРА Се затвораат и здрави компании, илјадници ставија клуч на врата

Бројот на компании што престанале да работат во Германија во текот на минатата година се зголемил за речиси 10 проценти во однос на претходната година. Последен пат поголем број затворања бил регистриран во 2007 година, кога без работа останале речиси 208.000 компании.

Со тоа продолжува негативниот тренд, бидејќи ова е втора година по ред во која расте бројот на затворени бизниси.

„Кризата сега се шири низ речиси целата економија“, изјави Патрик-Лудвиг Ханч, раководител на економските истражувања во „Creditreform“.

Тој посочи дека ситуацијата е особено загрижувачка затоа што, за разлика од претходните години, сè почесто се затвораат и компании кои претходно се сметале за финансиски стабилни. Најголем број затворања се регистрирани во угостителството и туризмот. Во текот на 2025 година биле затворени околу 15.000 ресторани и сместувачки капацитети, што претставува раст од 15 проценти во споредба со 2024 година.

Негативниот тренд во здравствениот сектор продолжува веќе околу десет години. Минатата година бројот на затворени компании во овој сектор достигнал речиси 11.000, што е речиси двојно повеќе во споредба со 2008 година. Особено загрижувачки е податокот дека биле затворени речиси 5.500 лекарски ординации, односно 23 проценти повеќе отколку една година претходно. Како една од главните причини се наведува пензионирањето на лекарите, по што во голем број случаи не бил пронајден лекар кој би ја презел ординацијата.

Проблемите не ја заобиколуваат ниту индустријата. Во текот на 2025 година биле затворени околу 11.000 индустриски компании, што е 10 проценти повеќе во споредба со претходната година. Податоците покажуваат дека затворањето на бизнисите повеќе не е ограничено само на неколку проблематични сектори, туку сè повеќе го зафаќа целото стопанство.