КРАДЦИТЕ МИСЛЕЛЕ ДЕКА УСПЕАЛЕ По месеци потрага пронајдени трите украдени ремек-дела
Делото на Сезан само вреди околу 6 милиони евра, а италијанската полиција сега го расплетува случајот.
Италијанската полиција успеа да пронајде три вредни уметнички дела од Пјер-Огист Реноар, Пол Сезан и Анри Матис, кои беа украдени во март од фондацијата „Мањани Рока“ во близина на Парма. Вредноста на трите ремек-дела се проценува на повеќе од 9 милиони евра.
Станува збор за „Les Poissons“ на Реноар, „Tasse et Plat de Cerises“ на Сезан и „Odalisque sur la Terrasse“ на Матис. Делата биле откриени во стан во Парма по детална истрага спроведена од карабињерите задолжени за заштита на културното наследство.
Кражбата се случила во ноќта меѓу 22 и 23 март, кога маскирани крадци упаднале во музејот и за помалку од три минути ги симнале трите слики од ѕидовите. Целиот грабеж бил снимен од безбедносните камери.
Највредно е делото на Сезан, чија вредност се проценува на околу 6 милиони евра. Сликата на Реноар вреди околу 3 милиони евра, додека делото на Матис има значително пониска проценета вредност.
Во рамки на истрагата, девет државјани на Молдавија се под истрага поради сомнеж дека се поврзани со кражбата. Италијанските власти продолжуваат да ги утврдуваат сите детали од случајот, како и евентуалната улога на осомничените.
Фондацијата „Мањани Рока“ ја чува богатата колекција што ја создал италијанскиот историчар на уметност и колекционер Луиџи Мањани. Во неа се наоѓаат дела од некои од најголемите имиња во историјата на уметноста, меѓу кои Тицијан, Гоја, Моне и Рубенс.
По неколкумесечна потрага, трите украдени ремек-дела се повторно во рацете на италијанските власти.
