ГРЕНЛАНД БИЛ САМО ПОЧЕТОК Русија откри што навистина сакал Трамп
Според Кобјаков, американскиот план бил многу поширок и опфаќал стратешки важни делови од Арктикот.
Планот на американскиот претседател Доналд Трамп поврзан со Гренланд, всушност, бил дел од поширока стратегија на Вашингтон за воспоставување контрола врз значителен дел од Арктикот, тврди Антон Кобјаков, советник на рускиот претседател Владимир Путин и извршен секретар на Организацискиот комитет на Источниот економски форум.
Според Кобјаков, зад иницијативата за Гренланд стоела идеја за проширување на американското влијание врз стратешки важни арктички територии и поморски рути.
Тој посочува дека планот не се однесувал само на Гренланд, туку и на Северозападниот премин северно од Канада. Според него, токму поради тоа прашањата околу Гренланд и Канада се тесно поврзани со пошироките американски интереси на Арктикот.
Кобјаков смета дека американската стратегија опфаќала и европскиот север, сè до руските води во Баренцовото Море, каде што започнува Северниот морски пат.
Според неговото толкување, воспоставувањето контрола врз овие клучни области би ѝ овозможило на Америка, со поддршка од скандинавските земји, пред сè Норвешка, да создаде алтернатива на рускиот Северен морски пат и да се натпреварува со неговиот стратешки и економски потенцијал.
„Станува збор за создавање алтернативна поморска рута од Тихиот Океан до Северниот Атлантик, односно Европа“, изјави Кобјаков.
Тој додава дека, барем засега, овој проект е ставен настрана.
