ГЕРМАНЦИТЕ БЕГААТ ВО ПОЛСКА 6.000 компании инвестирале 50 милијарди евра, економијата расте 19 пати побрзо од германската

Германските инвеститори ја избираат Полска поради побрзите процедури, пониските трошоци и подобрата дигитална администрација.

ГЕРМАНЦИТЕ БЕГААТ ВО ПОЛСКА 6.000 компании инвестирале 50 милијарди евра, економијата расте 19 пати побрзо од германската
Фото: Принтскрин

Полска сè повеќе се наметнува како една од најдинамичните економии во Европа, привлекувајќи милијарди евра странски инвестиции, нови фабрики и работници, додека германските компании сè почесто го префрлаат производството кај својот источен сосед. Според репортажа на германскиот јавен сервис АРД, во Полска работат околу 6.000 германски компании, кои досега инвестирале приближно 50 милијарди евра.

Особено впечатлива е разликата во економскиот раст. Во 2025 година полската економија пораснала за 3,8 проценти, додека германската забележала раст од само 0,2 проценти. Претходната година Полска имала раст од 3 проценти, наспроти падот од 0,5 проценти во Германија.

Причината за интересот не се само пониските трошоци за работна сила, туку и побрзата администрација, поедноставените процедури, инфраструктурата и дигитализацијата на јавните услуги. Како пример АРД ја посочува германската компанија „Д-р Шумахер“, чиј главен производствен погон се наоѓа во полскиот град Лубањ. Таму работат околу 1.200 луѓе, а годишното производство достигнува до 500 милиони пакувања хигиенски и дезинфекциски марамчиња.

Според директорот Паул Станек, изградбата на нова фабричка хала во Полска може да трае една до една и пол година, додека во Германија само процедурите за дозволи можат да одземат и до три години.

Промените се забележуваат и во миграцијата. Во 2024 година речиси 91.000 луѓе се преселиле од Германија во Полска, додека во спротивната насока заминале околу 82.000 лица. Полска дополнително ги привлекува работниците и повратниците со даночни олеснувања. Младите до 26 години, под законски утврдени услови, се ослободени од персонален данок за приходи до 85.528 злоти годишно. Слично олеснување во период од четири години можат да користат и одредени повратници од странство.

Германските инвеститори посебно ја истакнуваат дигиталната администрација во Полска, каде што голем број јавни услуги се достапни електронски. Ларс Гутхајл од Германско-полската индустриска и трговска комора оценува дека Полска во дигитализацијата на јавната управа е најмалку една деценија пред Германија.

Дополнителна предност се големите инфраструктурни инвестиции. Во последните две децении Полска ја проширила мрежата на главни патишта за повеќе од 4.000 километри, а планира и нови големи инвестиции во аеродромската и железничката инфраструктура.

Полска така сè повеќе се претвора во важен производствен и инвестициски центар на Европа. Иако Германија и понатаму има многу поголема економија, разликата во темпото на раст и сè поголемиот интерес на германските компании покажуваат дека економската рамнотежа во Европа постепено се менува.

CATEGORIES
Share This