ГАШИ ПРЕСЕЧЕ Нема да има предвремени парламентарни избори
Претседателот на Собранието вели дека актуелниот мандат ќе продолжи, и покрај засилените политички тензии и барањата од опозицијата.
На редовниот понеделнички брифинг со новинарите, Гаши категорично ја отфрли можноста за предвремено распуштање на Собранието и скратување на актуелниот мандат. Неговата изјава доаѓа во период на засилени политички тензии и чести повици од опозициските партии за промени и избори.
Одговарајќи на прашањето на што ја темели својата увереност, имајќи ја предвид зголемената политичка реторика во земјата, Гаши кратко посочи дека неговата проценка се темели на долгогодишното политичко искуство и интуиција.
И покрај политичките превирања и секојдневните партиски препукувања, собраниското раководство уверува дека институцијата продолжува со редовната работа. Фокусот, како што беше посочено, останува на законската агенда и носењето закони од интерес за граѓаните.
Прашањето за одржување предвремени парламентарни избори, според Гаши, во моментов не е дел од актуелната политичка агенда.
