ДОНЕСЕНА ОДЛУКАТА Даниела Димовска е новата претседателка на Кривичниот суд во Скопје
Судскиот совет ја избра Димовска по оценка дека понудила покомплетна програма и покажала одлични менаџерски способности.
Судијката Даниела Димовска е избрана за нова претседателка на Основниот кривичен суд Скопје, по одлука на Судскиот совет.
На огласот за избор на претседател на судот се пријавија двајца кандидати, актуелната вршителка на должноста Димовска и судијата Ивица Стефановски. По спроведената постапка, Судскиот совет оцени дека програмата на Димовска е посеопфатна и дека таа покажала високи менаџерски способности, поради што ја доби довербата за раководење со судот.
Претседателот на Комисијата за избор, Ивица Николовски, информираше дека двете кандидатури биле комплетни и ги исполнувале законските услови. Кандидатите ги поминале предвидените тестирања и интервјуа, по што Комисијата го усвоила извештајот, а Судскиот совет со гласање ја избрал Димовска за претседателка на судот.
Димовска изминатата година ја извршуваше функцијата вршител на должност претседател на Основниот кривичен суд Скопје. Пред тоа беше судијка во Одделението за организиран криминал и корупција при истиот суд.
