ДИПЛОМАТСКА ПРЕСМЕТКА НА БЛИСКИОТ ИСТОК Израел ќе го признае ерменскиот геноцид, Анкара бесна

Израелскиот министер за надворешни работи Гидеон Саар планира во недела пред кабинетот да поднесе резолуција со која официјално би се признал геноцидот врз Ерменците во последните години од постоењето на Отоманската империја. Одлуката, доколку биде усвоена, се очекува да предизвика жестока реакција од Анкара.

Ерменскиот народ со децении бара меѓународно признавање на масовните убиства, депортациите и страдањата од почетокот на 20 век, при што се проценува дека околу 1,5 милиони Ерменци го загубиле животот. Турција, како наследник на Отоманската империја, категорично го отфрла квалификувањето на овие настани како геноцид и тврди дека станувало збор за трагични последици од воениот период.

Израел долго време избегнуваше официјално признавање на ерменскиот геноцид, главно поради стравувањата дека тоа би можело да ги наруши односите со Турција. Сепак, тензиите меѓу Ерусалим и Анкара значително се зголемија во последните години, особено по нападот на Хамас врз Израел на 7 октомври 2023 година и последователната војна во Газа.

Турскиот претседател Реџеп Таип Ердоган жестоко ја критикуваше израелската воена операција во Газа, нарекувајќи ја геноцид, додека израелските власти ги отфрлија неговите обвинувања. Во таков амбиент, прашањето за ерменскиот геноцид повторно се најде во центарот на дипломатските пресметки.

Според аналитичарите, евентуалното признавање од страна на Израел нема да биде само историски чин, туку и политичка порака кон Турција, во период кога двете земји се наоѓаат во една од најтешките дипломатски кризи во последните децении.

Односите меѓу Ерусалим и Анкара остануваат сериозно нарушени, а новиот потег може дополнително да ги зголеми тензиите и да отвори нов фронт во веќе сложената геополитичка ситуација на Блискиот Исток.