ДЕНОВИ НА МЕДИУМСКАТА ПИСМЕНОСТ 2026 Повик за вклучување во кампањата „Сите имаме своја улога“

Од 26 октомври до 2 ноември 2026 година ќе се одржат Деновите на медиумската писменост (ДМП 2026), во организација на Агенцијата за аудио и аудиовизуелни медиумски услуги (АВМУ) и Мрежата за медиумска писменост (ММП). Со оваа иницијатива, Македонија по осми пат се приклучува кон одбележувањето на Глобалната недела на медиумска и информациска писменост на УНЕСКО.

Мотото на годинашното издание е „Сите имаме своја улога“, кое се надоврзува на глобалната тема „Сите имаме своја улога – медиумска и информациска писменост за луѓето“ („We All Play a Part – Media and Information Literacy for the People“).

Кампањата ја нагласува важноста на придонесот на секој поединец, организација, институција и медиум во развивањето на критичкото мислење и јакнењето на отпорноста кон дезинформациите и штетните содржини.

По тој повод, АВМУ и ММП упатуваат повик до медиумите и другите заинтересирани субјекти да се вклучат во промовирањето на Деновите на медиумската писменост 2026 преку објавување и споделување на промотивните материјали од кампањата. Материјалите се достапни на македонски, албански и англиски јазик, а приспособени се и за лицата со сетилна попреченост преку титлување.