CNN ОТКРИВА – Иран ја враќа воената моќ за само неколку месеци

Според извештаи на CNN, повикувајќи се на извори од американската разузнавачка заедница, Иран за време на шестнеделното примирје, кое започнало на почетокот на април, значително го забрзал обновувањето на своите воени капацитети, особено производството на беспилотни летала.

Американските разузнавачки проценки укажуваат дека Иран ги надминува првичните очекувања и многу побрзо ги санира штетите настанати од нападите на САД и Израел. Се обновуваат ракетни локации, лансери и производствени капацитети, што би можело да ја одржи земјата како значајна безбедносна закана во регионот.

Според еден американски функционер, Иран би можел целосно да ја врати способноста за производство и употреба на дронови во рок од околу шест месеци. Тој додава дека разузнавачката заедница не очекувала толку брзо темпо на опоравување.

Во дел од анализите се наведува дека Русија и Кина придонесуваат за овој процес преку снабдување со компоненти, иако Пекинг ги отфрла овие обвинувања, тврдејќи дека не се засновани на факти.

И покрај претрпената штета, проценките покажуваат дека Иран задржал значаен дел од своите капацитети, вклучително балистички ракети, беспилотни летала и противвоздушни системи. Дел од извештаите наведуваат дека околу половина до две третини од ракетните лансери останале функционални.

Од друга страна, американската страна тврди дека операцијата „Епски бес“ уништила околу 90% од иранската воено-индустриска инфраструктура, што укажува на значајни разлики меѓу воените и разузнавачките проценки за вистинската состојба.