БАРСЕЛОНА Е ПОГОЛЕМА ОД ТЕБЕ Гаспарт му испрати жестока порака на Меси

Збогувањето на Лионел Меси со аргентинската репрезентација повторно ја отвори темата дали легендарниот фудбалер ќе добие можност достојно да се прости и од навивачите на Барселона, клубот во кој ја изгради својата фудбалска империја.

Од „Камп Ноу“ повеќепати испраќаа пораки дека сакаат да му организираат официјално збогување на Аргентинецот, особено откако ќе заврши реконструкцијата на стадионот. Сепак, односите меѓу Меси и актуелниот претседател Жоан Лапорта остануваат нарушени, што отвора прашања за тоа како би изгледала евентуалната церемонија.

На оваа тема се огласи и поранешниот претседател на Барселона, Жоан Гаспарт, кој испрати остра порака до Меси. Гаспарт, кој беше на чело на клубот кога Аргентинецот имаше само 13 години и пристигна во Барселона, смета дека личните несогласувања не смеат да бидат пречка за неговото збогување со навивачите.

„Лео е неспорен фудбалер, најдобриот на светот и одличен играч. Но, има една работа што не смее да ја заборави: Барселона е поголема од него и треба да биде внимателен. Ова го кажувам од историската љубов што ја имам кон играчот што го потпишав кога имаше 13 години, додека јас бев претседател на Барса“, порача Гаспарт.

Поранешниот прв човек на каталонскиот гигант нагласи дека успехот на Меси во голема мера е поврзан со клубот во кој ги помина најважните години од кариерата.

„Тој е одличен играч, најдобар во светот, делумно нема да кажам во колкав процент благодарение на Барса. Затоа, не смее да го заборави тоа“, истакна Гаспарт.

Тој додаде дека засега му дава простор на Меси, но предупреди дека неговиот став би можел да се промени доколку Аргентинецот постави какви било услови за официјалното збогување.

„Сè уште му давам грејс-период, но ќе дојде ден кога ќе почне да ме загрижува ако господинот Меси постави дури и најмала пречка за да дојде во Барса и да се збогува со навивачите“, порача поранешниот претседател.

Гаспарт беше уште подиректен кога го отвори прашањето дали евентуалното присуство на Лапорта би можело да влијае врз одлуката на Меси да се врати на „Камп Ноу“ за последен поздрав.

„Кој и да е претседателот, Меси мора да дојде и да се збогува со Барса. Ако Лео Меси дојде да се збогува дури откако Лапорта повеќе нема да биде тука, а одбие да дојде затоа што Лапорта е претседател, јас не би му оддал почит. Кој мисли дека е? Да го условува доаѓањето во Барселона со тоа дали Лапорта е таму или не? Ако Лапорта не беше таму поради таквата состојба, јас не би присуствувал на таа почит“, изјави Гаспарт.

Со оваа изјава, поранешниот претседател јасно порача дека, според него, евентуалните лични несогласувања меѓу Меси и Лапорта треба да останат настрана кога станува збор за оддавањето почит на една од најголемите легенди во историјата на Барселона.

Останува отворено прашањето дали Меси навистина ќе се врати на „Камп Ноу“ за официјално збогување и дали клубот ќе успее да го организира моментот што навивачите го очекуваат уште од неговото заминување во 2021 година.